ᤗᤢᤁᤠ 7:38-50

³⁸ᤕᤧᤛᤢᤖᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤋᤩᤧᤀᤠᤱ ᤜᤠᤒᤧᤖ ᤕᤧᤛᤢᤖᤧ ᤁᤢᤗᤠᤱᤅᤥ ᤁᤢᤔᤡᤰᤘᤠ᤺ᤸᤗᤧ ᤘᤠᤖᤰᤂᤢᤖᤥ॥ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤜᤣ᤺ᤛᤢᤖ ᤁᤢᤗᤠᤱᤅᤡᤴ ᤆᤢᤵ ᤔᤧᤳᤋᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢᤖᤥ॥

³⁹ᤜᤧᤰᤁᤣ᤺ᤸᤗᤧ ᤂᤧᤴ ᤑᤖᤡᤛᤡ᤺ᤸᤗᤧ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤁᤴ ᤔᤏᤠ᤺ᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧᤸᤗᤧᤃ ᤂᤢᤏᤧ᤹ ᤁᤧᤛᤢᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤒᤠᤔᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤗᤠᤕᤥ ᤁᤧᤈᤥ᤺ᤰᤔᤠᤀᤣᤖᤥ॥”

⁴⁰ᤕᤧᤛᤢᤖᤧ ᤂᤧᤴ ᤑᤖᤡᤛᤡ᤺ᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠ ᤁᤳᤋᤢᤱᤗᤥ॥” ᤛᤡᤔᤥᤏᤖᤧᤀᤠᤱ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤔᤧᤳᤋᤠᤱᤅᤧ᤹ᤀᤥ॥”

⁴¹ᤕᤧᤛᤢᤖᤧ ᤔᤧᤳᤋᤢ. “ᤌᤡᤰ ᤋᤧᤴᤏᤥ ᤏᤧᤵᤑᤢ ᤔᤏᤠᤜᤠ᤹ ᤘᤕᤧᤳᤇᤡ॥ ᤂᤧᤱᤜᤠ᤹ᤖᤧ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤥᤗᤠᤶ ᤗᤳᤇᤠᤖᤧ ᤅᤠᤃᤡᤵ (᥋᥆) ᤕᤢᤵᤐᤠᤕᤠᤱ ᤏᤢ ᤘᤣ᤹ᤛ᤻ᤔᤠᤸᤗᤧ ᤁᤢᤃᤡᤵ ᤅᤠᤛᤡ (᥋᥆᥆) ᤕᤢᤵᤐᤠᤕᤠᤱ ᤋᤣ᤹ᤖᤧᤳᤇᤢᤀᤠᤱ ᤘᤕᤧᤳᤇᤡ॥

⁴²ᤁᤖ ᤂᤧᤴ ᤏᤧᤵᤔᤠᤱᤗᤧ ᤜᤢᤱᤔᤠ ᤔᤧᤴᤇᤢᤰᤁᤣ ᤘᤕᤧᤳᤇᤡ॥ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤧ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤛᤡᤱᤏᤠ᤺ᤳᤋᤡᤴ ᤗᤧᤖᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤗᤧᤵᤔᤡ ᤁᤧᤒᤡᤒᤠᤴ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠ᥅”

⁴³ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤂᤧᤴ ᤕᤖᤡᤰ ᤛᤡᤱᤏᤠ᤺ᤳ ᤗᤧᤵᤔᤡ ᤁᤧᤄᤥ᤺ᤒᤠᤴᤏᤣ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥”

⁴⁴ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤡᤔᤥᤴᤏᤡᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤋᤩᤠᤱᤅᤡᤸᤗᤧ ᤗᤠᤱ ᤘᤠᤜᤵᤔᤠ ᤆᤫᤠ᤺ᤳ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤡᤴ ᤁᤢᤔᤡᤰᤘᤠ᤺ᤸᤗᤧ ᤘᤠᤜᤵᤋᤢᤀᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤘᤠ᤹ᤖᤥ॥

⁴⁵ᤂᤧᤏᤧ᤹ ᤀᤡᤱᤃᤠ᤹ ᤆᤢᤵ ᤁᤧᤔᤧᤳᤋᤠᤱᤗ ᤛᤣᤘᤠ ᤁᤧᤶᤔᤧᤳᤋᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤋᤩᤠᤱᤅᤠᤱᤎᤥᤀᤣ ᤀᤠᤗᤠᤱᤅᤥ ᤆᤢᤵ ᤔᤧᤳᤋᤢᤖ ᤘᤠ᤹ᤖᤥ॥

⁴⁶ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤎᤧᤃᤣ᤺ᤰᤐᤥ ᤏᤡ᤺ᤱᤃᤧ᤹ ᤁᤧᤴᤜᤢ᤺ᤳᤋᤠᤱᤅᤡᤴ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤥ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥

⁴⁷ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤒᤠᤸᤗᤧ ᤕᤖᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤛᤢ᤹ ᤁᤧᤗ᤹ᤒᤠ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤂᤧᤴ ᤆᤢ᤺ᤳᤇᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤒᤠᤸᤗᤧ ᤛᤢ᤺ᤸᤗᤡᤰᤗᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ”

⁴⁸ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤛᤢᤀᤠᤱ ᤁᤧᤘᤠ᤹ᤖᤥ॥”

⁴⁹ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤆᤠ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤒᤡᤒᤠ ᤁᤴ ᤕᤠᤵᤔᤡ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥

⁵⁰ᤁᤖ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤋᤠᤱᤃᤧᤛᤧ᤺ᤵᤋᤧᤀᤠᤱ ᤁᤧᤘᤠ᤹ᤖᤥ॥ ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ॥”