SAN LUCAS 7:38-50

³⁸Chahn nda̱ te, ne chehntihya te na̱n Dihvo vo. A̱ma raco te, ne cana̱n te redeca̱hnda te ca̱h ye nduco nune ndutena̱n te. Rendedetih te nduco yudo tin te. Retena̱n te ca̱h ye, ne chacota̱hma te nuneda̱n me.

³⁹Ndihche sa̱hn fariseo me, ne ndedecadino se: “Ta̱hn tih ne, chihnga̱ ihyan te. Ndete che cua̱co che profeta ihyan tih ne, cadino ye duh ihyan te.”

⁴⁰Tuhme ra̱hn Dihvo vo ri ye sa̱hn fariseo me: ―Simón, nté a̱ma ejemplo, cahneven. Ndahconan Simón: ―Ihyan Ricuahn, cuente ne, cahneván.

⁴¹Ra̱hn ye: ―O se ne, quendihco se yahn a̱ma ihyan. A̱ma se ne, quendihco se uhn ciento, ne ta̱ma se ne, quendihco se o raco ndiche.

⁴²Nducote metah dehva yahn sa̱hn chahn ne, hua chi nedihve se yahn ye. Ate nchahco ye yahn nduh che o se. Ma̱n ne, cahme co u: ¿Cha sa̱hn chahn che tahque yahino se ihyan min ne?

⁴³Ndahconan Simón: ―Ra̱hcó te sa̱hn che tahque ndeh quendihco se yahn ye. Ra̱hn Dihvo vo ri ye Simón: ―Nda̱hca̱ rahn.

⁴⁴Chaconan ye, ndihchero ye nda̱hta me, ne tuhme ra̱hn ye ri ye Simón: ―¿A chihque cuda̱do nduhca̱ che din nda̱hta tih ne? Chendá̱ chete vaque, ne hua te nune ca̱va che ntu cá̱h, ate nda̱hta tih ne, deca̱hnda te cá̱h nduco nune ndutena̱n te, ne ndedetih te nduco yudo tin te.

⁴⁵Di ne, hua tenan u che nevahnecon u, ate nda̱hta tih ne, nde ura che ndá̱ ndevaque, nde meniyon ne, hua reguan te retena̱n te cá̱h.

⁴⁶Hua chih aceite tín, ate nda̱hta tih ne, chacota̱hma te nuneda̱n cá̱h.

⁴⁷Chemin che rá̱hn rí di te nducote a̱ma va vedeyahino yahn te ne, codevene te va vederenchahco ca̱va te, andahre a̱ma quendihco te nunde. Ate ihyan che nda̱ca ye vederenchahco yahn tah sihn che quendihco ye ne, hua chahte vedeyahino yahn ye.

⁴⁸Tuhme ra̱hn Dihvo vo ri ye nda̱hta me: ―A nchahcó nunde yehn.

⁴⁹Nducoya̱ca ihyan che vate ye min, reh ye nduco Dihvo vo ne, ndedecadino ye: “¿Duhra sa̱hn tih che ra̱hco se che renchahco se nunde yahn ihyan?”

⁵⁰Ate ra̱hn Dihvo vo ri ye nda̱hta me: ―Yahn che chitehne ne, ndaque vederenchahco. Conahn. Dehve rahque.