Lukas 7:38-50

³⁸Duon do nigsasindog ka boi to longod to paa ni Hisus no nakasinogow on sikandin. Nasubid on ka paa ni Hisus no nigtuluan to luwo to boi, no nigpunasan to boi ka paa rin to bulbul din. Napongaan din on to nigpunas, nigharokan din ka paa rin woy nigbus-ugan din on ka paa rin to sikan no mohomut no ogkounawa to lana no nig-alap din.

³⁹Nò, ka Parisiu no nigpatugun ki Hisus, pogpitow rin to pighimu to boi ki Hisus, kagi to goinawa rin to, “Man naan poron ko talagnangon pa to kagi to Magboboot ka soin no lukos, ogtokoron din poron ko hontow ka soin no boi no ogpunas to paa rin to makasasalo no boi ian.”

⁴⁰Kagi ni Hisus no intabak to kagi dut goinawa to tagbanwa to, “Simon, duon ignangon ku koykow.” Kagi to tagbanwa to, “Nokoy naan Maistru ka ignangon nu koddi?”

⁴¹Nigtabak si Hisus to pananglitan. Kagi rin, “Duon darua no otow no nakasamboy to salapi to songo datu. Ka sagboka, nigsamboy to lalimma no gatus. Ka dangob, kalimmaan do ka nigsambayan din.

⁴²Nò,” kagi ni Hisus, “ko waro makabayad ka sika darua no otow to pig-utang dan, nig-awo on dut datu ka utang to sika darua no otow.” Kagi ni Hisus to tagbanwa, “Og-inso a koykow ko hondoi buwa to sika darua ka dakoldakol no goinawa rin to sika datu?”

⁴³Nigtabak si Simon to, “Ian buwa dakol ka goinawa to sikan no otow ka naawo on ka utang din no dakol.” “Hoo,” kagi ni Hisus ki Simon, “malogot ian ka intabak nu.”

⁴⁴No niglingi si Hisus to boi no kagi ni Hisus ki Simon to, “Ogkitoon nu ka soini no boi. Ganna, to nigsolod a to baloy nu, waro a nu bogayi to woig no ighugas to paa ku unawa to batasan ta, di sikandin atag, nigsubiran din ka paa ku to mgo luwo din no nigpunasan din to bulbul din.

⁴⁵To nigsolod a,” kagi ni Hisus, “Waro a nu haroki unawa to batasan ta ko duon ogpanumbaloy di ka soini no boi, ligkat to pogsolod ku kai to baloy nu, waro nighagtong ka sikan no boi to ogharok to soin no paa ku.

⁴⁶Wara a nu sabuki to lana to ulu ku unawa to batasan ta to magaliug, di ka soin no boi, nigbus-ugan din ka paa ku to mahal no ogkounawa to lana no mohomut.

⁴⁷Kuntoon,” kagi ni Hisus to sika tagbanwa, “ka ignangon ku koykow, napasaylu on to Magboboot ka tibo no mohon-ing no salo to soini no boi no sikan ian to impakita rin ka dakol no goinawa rin koddi. Ko molintok ka salo no napasaylu to songo otow, songo molintok ka goinawa to sika otow dut otow no niglipuas kandin.”

⁴⁸Kagi ni Hisus to sikan no boi to, “Napasaylu on ka mgo salo nu.”

⁴⁹Nò, ogmakagkagioy ka mgo duma no magaliug no kagi ran, “Hontow ka soini no otow no ogpasaylu to mgo salo to soin no boi?”

⁵⁰Kagi ni Hisus to sikan no boi to, “Ka pogtuu nu koddi ian nakalipuas koykow to mgo salo nu. Hipanow kad on su malinow on ka goinawa nu dio to tangkaan to Magboboot.”