1Sipu ele ene hola hite la gua se Devita koa sa batu toqere si hinoqa tutuvia e Ziba si asa, sa nabulu te Mepiboseti. Va paleke ni sa koari kaiqa doṉ'ki, si karua gogoto bereti, keke gogoto kata qurepi tava popadi, keke gogoto kata vua huda piqi, meke keke baika kapu kurukuru siṉia na vaeni.
2Meke nanasia Devita si asa, “Na sa kote taveteni goi sari doduru sara?” Olaṉa se Ziba, “Sari na doṉ'ki si pude tadi na mua tatamana baṉara pude koi i koarini; sari na bereti meke na vua huda si pude tadi na tie pude henahena, meke sa vaeni si pude na napo tadirini pana mabo si arini pa soloso qega, gua.”
3“Avei se Mepiboseti sa tuna sa tuna e Saula sa mua palabatu?” gua sa baṉara koa sa. “Korapa koa nana pa Zerusalema,” olaṉa gua se Ziba, “Sina ta hoqa nia sa sapu kaqu ta vala pule koa sa sa binaṉara tanisa tamana sa tamana e Saula, gua.”
4Zama sa baṉara koe Ziba, “Sari doduru likakalae te Mepiboseti si tamugoi mo kamahire.” “Arau si na mua nabulu,” olaṉa gua se Ziba, “Hiva va qetua rau doduru totoso sa qua baṉara.”
5Sipu kamo pa Bahurimi se Devita, keke rina turaṉana Saula, e Simei sa tuna Qera, si vura mae meke tutuvia si asa; leve nia sa se Devita sipu korapa ene mae sa.
6Koa varilikohae nia ri na nana tie meke sari nana tie kopu si asa, ba podalae gona nia patu Simei se Devita meke sari nana koimata.
7Zama panipania Simei si asa, “Taloa! Tie va mate tie! Tie kaleamu na loke laemu!
8Ele vagia goi sa binaṉara te Saula, meke kamahire si va kilasigo Zihova si goi pa vina matedi ri soku puku tatamana te Saula. Sa binaṉara si ta vala koasa tumu Abusalamu, meke namu loke laemu hokara si goi kamahire, agoi na tie va mate tie!”
9Abisai, sapu sa tuna e Zeruia, si zama koasa baṉara, “Baṉara na pude vegua ke va malumia goi sa siki sana pude zama panipanigo? Atu, maqu kupa pania gana batuna vasina!”
10“Namu loke mua ginugua hokara si goi koasa ginua hie” gua si zama nia sa baṉara koe Abisai meke sa tasina se Zoabi. “Be zama panipani au sa si rau sina e Zihova tu zama ia pude tavete gua asa, si loke tie si boka hukatia sa nana zinama.”
11Meke zama se Devita koe Abisai meke koa ri doduru nana koimata, “Sa tuqu soti mo si korapa podekia pude va mateau si arau; ke na vegua ke kaqu magasa nia gamu sa tie Benisimane hie? E Zihova tu tozi nia si asa pude zama panipani au, ke vekoa tu. Mani tavetia, sapu gua asa.
12Gina kote doṉo gilania mo Zihova sa qua minalaṉa meke poni nau kaiqa minana pude hobea sa nana ṉinovaṉovala.”
13Ke ene hola la se Devita meke sari nana tie pa siraṉa. Luli tugo se Simei koa rini, ene pa kali toqere si asa. Zama panipani na gona ni patu na pepeso sa si arini sipu ene luli si asa.
14Mabo sa baṉara meke sari nana tie sipu kamoa rini si pa Zodani, ke magogoso si arini vasina.
15Kamoa Abusalamu meke sari nana tie si pa Zerusalema, meke somana luli tugo koa rini se Ahitopeli.
16Sipu tutuvia Husai, sa baere ta ronuna te Devita, se Abusalamu, si kukili si asa, “Mani toa va gelenae sa baṉara! Mani toa va gelenae sa baṉara!” gua.
17“Na sa si ta evaṉa koa sa mua binaere ṉoṉona koe Devita?” Nanasa gunia Abusalamu si asa, “Na vegua ke lopu lulia goi si asa?”
18Olaṉa se Husai, “Ve kaqu gua si arau? Arau si tanisa tie sapu ele vizatia Zihova, koa rina tie hire, meke koari doduru tie Izireli. Kaqu koa turaṉigo rau si goi.
19Meke gua pule he, esei pule si kaqu nabulu nia rau, lopu sa tuna koreo sa qua palabatu? Gua sapu ele nabulu nia rau sa tamamu, si kamahire si kaqu nabulu nigo rau si goi.”
20Meke liṉana la se Abusalamu koe Ahitopeli meke zama, “Kamahire sipu koa si gita tani, na sa si kaqu vizata ponini gita goi pude tavetia?”
21Olaṉa se Ahitopeli, “La mamu va sea i sari na nabulu barikaleqe tanisa tamamu saripu veko hola i sa pude kopu nia sa vetu baṉara. Meke kote tiqe ta gilana koari doduru tie Izireli sapu na nana kana sa tamamu si goi, meke sari na mua tie si kaqu tava ṉaliṉali sisigiti.”
22Ke va turua rini si keke ipi te Abusalamu pa batuna sa vetu baṉara, vasina sapu boka dogoro betoa ri doduru tie se Abusalamu sapu nuquru la meke va sea betoi sari doduru nabulu barikaleqe tanisa tamana.
23Sari vinari tokae pa binalabala sapu vala i e Ahitopeli koari na rane arini si gua puta tugo na zinama te Tamasa sapu luli betoi mo ari Devita e Abusalamu.
