Salmos 103

1

2

8

19

22

23

34

37

40

46

51

73

90

91

95

100

102

103

117

118

121

131

135

138

139

146

150

¹Laꞌ c chꞌujutisan c Yum ti pejtyelel c pusicꞌal. Laꞌ c chꞌujutisan jini chꞌujul bʌ i cꞌabaꞌ ti pejtyelel c pꞌʌtyʌlel.

²Laꞌ c chꞌujutisan c Yum ti pejtyelel c pusicꞌal. Machꞌan mi saj ñajʌyel tic pusicꞌal chʌ bʌ yes mi yʌqꞌueñonla.

³Jiñʌch muꞌ bʌ i ñusʌbeñon pejtyelel c mul. Miꞌ lajmisʌbeñon pejtyelel j cꞌamꞌan tyac.

⁴Miꞌ mʌñon loqꞌuel baꞌ colel c sajtyel. Miꞌ ñoj pʌsꞌeñon i pꞌuntyaya yicꞌot i yutslel.

⁵Miꞌ tijicñisañon ti wen tyac bʌ c majtyan wʌꞌ ti mulawil chaꞌan mic chaꞌ pꞌʌtyʌliyel cheꞌ bajcheꞌ xiyeꞌ.

⁶Lac Yum miꞌ mel ti tyoj jini tyʌcꞌlʌbiloꞌ bʌ. Mi quej i qꞌuextyʌbeñob i mul jini simaroñoꞌ bʌ.

⁷Tiꞌ pʌsꞌe Moisés chʌ bʌ chʌncol i ñaꞌtyan tiꞌ pusicꞌal. Tiꞌ pʌsꞌeyob israelob i chaꞌlibal.

⁸Lac yum miꞌ chaꞌlen pꞌuntyaya, uts i pusicꞌal. Jal mi michꞌan. Cabʌl miꞌ pꞌuntyañonla.

⁹Mach ti pejtyelel ora mi quej i ticꞌonla. Maꞌix mi quejel i michꞌqꞌuelonla ti beleꞌ ora.

¹⁰Maꞌan ti yʌcꞌonla wocol cheꞌ bajcheꞌ cꞌamel an lac mul Maꞌan tiꞌ qꞌuextyʌ lac mul cheꞌ bajcheꞌ cꞌamel an.

¹¹Como cabʌlʌch i yutslel i pusicꞌal cheꞌ bajcheꞌ i chañʌlel panchan Tiꞌ tyojlel jini muꞌ bʌ i bʌcꞌñañob.

¹²Cheꞌ bajcheꞌ i ñajtlel mulawil cꞌʌlʌl ti pasoꞌ qꞌuin cꞌʌlʌl ti pꞌʌjquib qꞌuin, Chʌꞌʌch i ñajtlel tiꞌ chocbeyonla majlel lac mul.

¹³Cheꞌ bajcheꞌ tyatyʌlob miꞌ pꞌuntyan i yalobilob, Cheꞌ jeꞌel lac Yum miꞌ pꞌuntyan jini muꞌ bʌ i bʌcꞌñañob.

¹⁴Como yujil cꞌuñonla, yujil melbilonla ti tsꞌubejn.

¹⁵Poj jumucꞌ jach cuxulonla cheꞌ bajcheꞌ jam. Jumucꞌ jach cuxulonla cheꞌ bajcheꞌ i ñich pimel.

¹⁶Cheꞌ mi ñumel icꞌ mi yajlel. Mach bej tsiquilix.

¹⁷Pero an i yutslel lac Yum ti pejtyelel ora. Lac Yum miꞌ pʌsꞌeñob i yutslel yicꞌot i tyojel jini muꞌ bʌ i bʌcꞌñañob yicꞌot jeꞌel i yalobilob, i yijob, yicꞌot i yijob i yijob cꞌʌlʌ ti beleꞌ ora.

¹⁸Miꞌ pʌsꞌeñob i yutslel lac Yum. Cheꞌ bajcheꞌ jaytiquil miꞌ chꞌujbibeñob jini trato bʌ i tꞌan Muꞌ bʌ i yʌcꞌob tiꞌ pusicꞌal i chaꞌlen bajcheꞌ tsꞌijbubil ti mandar tyac.

¹⁹Lac Yum tsaꞌix i waꞌchoco i yumintyel yaꞌ ti panchan Miꞌ chaꞌlen yumʌl ti pejtyelel mulawil.

²⁰Chꞌujutisanla lac Yum, jatyetla ajtroñelet bʌ la i chaꞌan chꞌoyolet bʌ la ti panchan. An cabʌl laꞌ pꞌʌtyʌlel. Chꞌujbibenla i tꞌan. Melbenla chʌ bʌ mi xiqꞌuetla laꞌ mel.

²¹Chꞌujutisanla lac Yum, jatyetla ajtroñelet bʌ la i chaꞌan Muꞌ bʌ laꞌ chaꞌlen chʌ bʌ yom Dios.

²²Chꞌujutisan lac Yum ti pejtyelel i melbal, Ti jujumpꞌej lum am bʌ tiꞌ wenta, Laꞌ c chꞌujutisan c Yum ti pejtyelel c pusicꞌal.