Salmos 2

1

2

8

19

22

23

34

37

40

46

51

73

90

91

95

100

102

103

117

118

121

131

135

138

139

146

150

¹¿Chucoch miꞌ chaꞌleñob michꞌlel quixtyañujob? ¿Chucoch lolon jach bʌ pensal mucꞌob tiꞌ bajñel pusicꞌal?

²Jini yumʌlob ti pañimil miꞌ chajpañob i bʌ. Jini yumʌlob miꞌ lajob i tꞌan Chaꞌan miꞌ contrajiñob lac Yum, Yicꞌot jini Rey yajcʌbil bʌ i chaꞌan.

³Mi yʌlob: Laꞌ lac tsꞌocben i lazojlel muꞌ bʌ i cꞌʌn i cʌchonla yubil. Laꞌ lac junyajlel choc jini lazo tyac chaꞌan mi laj cojlel tiꞌ pꞌʌtyʌlel Dios, cheꞌob.

⁴Pero mucꞌ ti tseꞌñal lac Yum yaꞌ ti panchan. Chʌncol i wajleñob.

⁵Michꞌicña mi quejel i yʌlꞌeñob. Mi quejel i bʌcꞌtisañob chaꞌan cabʌl i michꞌlel.

⁶Lac Yum mi quejel i yʌl: Yaꞌ ti Jerusalén, jini chꞌujul bʌ c lum, Tsaꞌix c waꞌchoco c Rey, jini yajcʌbil bʌ c chaꞌan, cheꞌen.

⁷Jini Yajcʌbil bʌ chʌncol i sub chʌ bʌ albil ti lac Yum: C Yum tiꞌ subon: Calobiletyʌch. Wale ti ili bʌ qꞌuin chʌncol c tsictisan chaꞌan calobiletyʌch.

⁸Cꞌajtibeñon. Mi quejel cʌqꞌueñet quixtyañujob chꞌoyoloꞌ bʌ ti pejtyelel mulawil. A chaꞌañobix mi majlelob.

⁹Mi quejel a jisan quixtyañujob yubil ti bara melel bʌ ti tsucul tyaqꞌuin. Mi quejel a bicꞌtisan lajal bajcheꞌ mi tyojpꞌel pꞌejt melel bʌ ti lum. Cheꞌ tiꞌ subeyon c Yum, cheꞌen.

¹⁰Jin chaꞌan laꞌ ocꞌac laꞌ ñaꞌtyʌbal, reyet bʌ la. Yom mi laꞌ jacꞌ laꞌ cʌntisʌntyel, jatyetla am bʌ laꞌ weꞌtyel ti mulawil.

¹¹Yom mi laꞌ bʌcꞌñan lac Yum cheꞌ mi laꞌ chꞌujutisan. Yom tijicñayetla. Qꞌuele ti ñuc lac Yum.

¹²Chaꞌ uts qꞌuelela i Yalobil lac Yum ame michꞌac. Ame jiliquetla yaꞌ ti laꞌ bijlel cheꞌ mi waꞌ michꞌan Dios. Cꞌajacñayob i yoj ti pejtyelel muꞌ bʌ i chꞌujbin lac Yum.