1Subula i ñuclel lac Yum. Ajtroñelet bʌ la i chaꞌan lac Yum, subula i ñuclel i cꞌabaꞌ.
2Jatyetla muꞌ bʌ laꞌ cꞌotyel ti waꞌtyʌl ti yotyot lac Yum, yicꞌot yaꞌ tiꞌ pam i yotyot,
3Subula i ñuclel lac Yum, como ñoj wen lac Yum. Cꞌʌyibenla i cꞌabaꞌ, como ñoj wen mi laj cꞌʌyeꞌ.
4Como lac Yum ti yajcʌ Jacob chaꞌan i chaꞌan bʌ como cheꞌ yom i pusicꞌal, Ti yajcʌ israelob chaꞌan mi yochel ti i chaꞌan bʌ.
5Cujil ñoj ñuc lac Yum. Cujil machꞌan yambʌ ñuc bʌ cheꞌ bajcheꞌ lac Yum tiꞌ tyojlel pejtyelel jini diosob.
6Lac Yum miꞌ mel pejtyelel chʌ bʌ yom i pusicꞌal yaꞌ ti panchan yicꞌot wʌꞌ ti mulawil, ti colem jaꞌ yicꞌot ti aban.
7Lac Yum miꞌ chꞌuy letsel lumi tyocal cꞌʌlʌl ti junwejlel pañimil. Miꞌ choc tyʌlel chajc yicꞌot jaꞌal. Miꞌ locꞌsan icꞌ tiꞌ yotlel baꞌ lotyol.
8Tiꞌ jisʌ jini ascuñʌl bʌ ti jujumpꞌej otyot añoꞌ bʌ ti Egipto. Yicꞌot ñaxan bʌ i yal alʌqꞌuil.
9Tiꞌ pʌsʌ seña tyac yicꞌot ñuc tyac bʌ i chaꞌlibal yaꞌ ti Egipto, Tiꞌ contra Faraón yicꞌot pejtyelel egiptojob.
10Tiꞌ jisʌ cabʌl pañimil tyac yicꞌot i yumʌlob añoꞌ bʌ cabʌl i wersajlel i tꞌan.
11Jiñʌch Sehón, i rey amorreojob yicꞌot Og, jini rey am bʌ ti Basán, Yicꞌot pejtyelel jini reyob añoꞌ bʌ ti Canaán.
12Lac Yum ti yʌqꞌueyob i lumal israelob chaꞌan mi yochelob tiꞌ yum ti pejtyelel ora.
13C Yum, mach jil a cꞌabaꞌ ti pejtyelel ora. C Yum mi quej i sujbel a ñuclel tiꞌ tyojlel lojon calobilob yicꞌot lojon quijob yicꞌot i yijob lojon quijob cꞌʌlʌ ti beleꞌ ora.
14Como lac Yum mi quej i melob ti tyoj i chaꞌañoꞌ bʌ. Mi quej i pꞌuntyan jini muꞌ bʌ i tsʌclañob.
15I diosob jini machꞌʌ baꞌan miꞌ ñaꞌtyañob, melbilob jach ti sʌsʌc tyaqꞌuin yicꞌot ti oro. I melbal tyac i cꞌʌb quixtyañujob.
16Aunque an i tiꞌ, mach yujil i chaꞌlen tꞌan Aunque an i wut, machꞌan chʌ bʌ miꞌ qꞌuel.
17Aunque an i chiquin, machꞌan mi yubin tꞌan. Aunque an i ñiꞌ, machꞌan miꞌ jap icꞌ.
18Lajalob jini winicob muꞌ bʌ i melob. Ti pejtyelel muꞌ bʌ i chꞌujbiñob junlajalob yicꞌot.
19Israelob, chꞌujutisanla lac Yum. Curajob, i jiñʌjlelet bʌ la Aarón, chꞌujutisanla lac Yum.
20I jiñʌjlelet bʌ la Leví, chꞌujutisanla lac Yum. Pejtyeletla muꞌ bʌ laꞌ qꞌuel ti ñuc lac Yum, chꞌujutisanla lac Yum.
21Laꞌ chꞌujutisʌntic lac Yum wʌꞌ ti Sión Como wʌꞌ chumul ti Jerusalén. Subula i ñuclel lac Yum.
