Salmos 51

1

2

8

19

22

23

34

37

40

46

51

73

90

91

95

100

102

103

117

118

121

131

135

138

139

146

150

¹Dios, pꞌuntyañon chaꞌan cabʌl i yutslel a pusicꞌal. Tic ñusʌbeyet a mandar. Ñusʌbeñon c mul como wen a wujil pꞌuntyaya.

²Luꞌ pocbeñon loqꞌuel jini machꞌʌ wen tsaꞌ bʌ c chaꞌle. Sʌc isʌbeñon c pusicꞌal chaꞌan tic chaꞌle mulil.

³Cujil isujm tic ñusʌbeyet a mandar. Mic ñaꞌtyan c mul ti pejtyel ora.

⁴Tij contrajiyet a bajñel cheꞌ ñac tic chaꞌle jini leco bʌ ti a tyojlel. Cheꞌ jini ti cʌcꞌʌ ti tsictiyel tyojʌch a tꞌan. Weñʌch maꞌ chaꞌlen melojel.

⁵Xmulilon ti chꞌocꞌʌyon. Añʌch c mul cꞌʌlʌ cheꞌ cʌñʌtyʌbilon tyo i chaꞌan c ñaꞌ.

⁶A wom a tyaj chʌ bʌ melel tiꞌ pusicꞌal quixtyañu. Jin chaꞌan aqꞌueñon c wen chꞌʌmben i sujmlel chʌ bʌ yes a wom.

⁷Sʌc isañon ti caj c mul Chaꞌan wen sʌc mi cajñel. Pocoyon chaꞌan más sʌc mi cajñel bajcheꞌ sʌsʌc bʌ tyocal.

⁸Ti a xulbon c bʌquel yubil. Laꞌ lajmicon chaꞌan mi cubin cꞌajacña bʌ coj.

⁹Mʌctyan a wut chaꞌan machꞌan maꞌ chʌc qꞌuelbeñon c mul. Yʌpbeñon pejtyel c mul.

¹⁰Dios, chaꞌ melbeñon c pusicꞌal ti sʌc. Chaꞌ tsijibtisan c chꞌujlel ti tyoj.

¹¹Mach a chocon loqꞌuel ti a tyojlel. Mach a chilbeñon loqꞌuel tic pusicꞌal Chꞌujul bʌ a Chꞌujlel.

¹²Chaꞌ aqꞌueñon cubin cꞌajacña bʌ coj chaꞌan j cotyʌntyel. Aqꞌueñon c wersa chaꞌan c mel chʌ bʌ tyoj ti jumpꞌej c pusicꞌal.

¹³Cheꞌ jini mi quej c pʌsbeñob a bijlel jini muꞌ bʌ i ñusʌbeñet a mandar. Xmulilob mi quejel i sutquiñob i bʌ baꞌ añet.

¹⁴Dios, ñusʌbeñon c mul como tic chaꞌle tsʌnsa. Dios, cajcotyaya, mi quej cꞌʌybeñet a tyojel.

¹⁵C Yum, jambeñon c tiꞌ Chaꞌan mic sub a ñuclel.

¹⁶Machꞌan maꞌ mulan tsʌnsʌbil bʌ a majtyan. Muqꞌuic a mulan mi cʌqꞌueñet pulem bʌ a majtyan Mach tijicñayet maꞌ qꞌueleꞌ.

¹⁷Jini muꞌ bʌ a mulan jiñʌch cheꞌ mi lojon c pecꞌ isan lojon c bʌ. I wenta tsʌnsʌbil bʌ a majtyan jini. Dios, machꞌan maꞌ tsꞌaꞌlen jini pecꞌ isʌbilix bʌ i pusicꞌal muꞌ bʌ i cʌy i mul.

¹⁸Pʌsbeñob i yutslel a pusicꞌal a chaꞌañoꞌ bʌ. Chaꞌ melel i tsꞌajquil tyac muꞌ bʌ i joy mʌctyan Jerusalén.

¹⁹Cheꞌ jini tijicña mi quej a qꞌuel tsʌnsʌbil bʌ a majtyan cheꞌ tyojʌch lojon c pusicꞌal. Tijicña mi quej a qꞌuel cotyol bʌ ofrenda yicꞌot pulem bʌ. Cheꞌ jini mi quej i yʌqꞌueñetyob tsʌnsʌbil bʌ tyat wacax yaꞌ ti yajnib pulem bʌ a majtyan.