1C Yum tsaꞌix a wen qꞌueleyon. Cʌmbiloñʌch a chaꞌan.
2A wujil cheꞌ mic buchtyʌl yicꞌot cheꞌ mic waꞌtyʌl. Maꞌ luꞌ cʌmbeñon c pusicꞌal cheꞌ wen ñajt añon.
3Maꞌ qꞌuelon cheꞌ mic majlel ti bij yicꞌot cheꞌ mij cꞌaj coj tic wʌyib. Cʌñʌl a chaꞌan pejtyelel c melbal.
4Cheꞌ max tyo locꞌ c tꞌan tic tiꞌ, a wujilix chuqui mi quej cʌl.
5Joyolon a chaꞌan. Maꞌ ticꞌon, maꞌ cotyañon. Cʌñʌtyʌbilon ti a pꞌʌtyʌlel.
6Maꞌan i pꞌisol j cʌñʌtyʌntyel. Mach chꞌujbi c luꞌ cʌn. Wen ñuc, mach chꞌujbi c chꞌʌmben isujm.
7¿Mejl ba c majlel baꞌ mach chꞌujbi i tyajon Chꞌujul bʌ a Chꞌujlel? ¿Mejl ba c putsꞌtyañet? Mach saj chꞌujbi.
8Muqꞌuic c letsel majlel ti panchan, yaꞌ añet. Yaꞌic añon ti yajnib sajtyemoꞌ bʌ, yaꞌ añet jeꞌel.
9Muqꞌuic c wejlel majlel ti ñajtyʌl baꞌ miꞌ pasel qꞌuin Chaꞌan mic chumtyʌl yaꞌ ti junwejl colem jaꞌ
10Jinic tyo yaꞌi mi quej a tyajon. Mi quej a cʌñʌtyañon ti pꞌʌtyʌl bʌ a cꞌʌb.
11Mi tic lolon alʌ: Mi quej c muc c bʌ baꞌ icꞌjowan, Mach chꞌujbi i qꞌuelon ti acꞌbʌlel, choꞌon. Pero mach cheꞌiqui como maꞌ qꞌuelon aunque ti acꞌbʌlel.
12Jini icꞌjowan bʌ mulawil machꞌan miꞌ mʌctyʌbeñet a wut. Lajal sʌc maꞌ qꞌuel acꞌbʌlel cheꞌ bajcheꞌ maꞌ qꞌuel qꞌuiñil Lajal mi cꞌotyel a wut ti icꞌtꞌojñal cheꞌ bajcheꞌ ti qꞌuiñil.
13Pejtyelel chʌ bʌ tyac an tic malil a melbalʌch. Ti a meleyon cheꞌ cʌñʌtyʌbilon tyo i chaꞌan c ñaꞌ.
14Mic sub a ñuclel como bʌcꞌñʌbilet. Ñoj wen bajcheꞌ ti a meleyon. Ñoj wen a melbal. Cʌñʌlʌch c chaꞌan iliyi.
15Mach muculic c bʌquel ti a wut, cheꞌ cʌñʌtyʌbilon tyo i chaꞌan c ñaꞌ. Chaꞌan ti cabʌl a ñaꞌtyʌbal ti a mucul tyecheyon ti colel.
16Ti a wʌ ñaꞌtyʌ bajcheꞌ quilal, cheꞌ max tyo bʌ añon. Tsꞌijbubilix ti a jun jaypꞌej tyo ora mi quejel cajñel ti mulawil.
17Ñoj cꞌotyajax bajcheꞌ maꞌ bej ñaꞌtyañon, c Dios. Mach chꞌujbi c tsic jayyajlel maꞌ ñaꞌtyañon ti jujumpꞌej qꞌuin.
18Muqꞌuic c jop c tsic, más on ti tsicol bajcheꞌ jini jiꞌ. Cheꞌ mic tyejechel ti wʌyel, añon tyo a wicꞌot.
19Muqꞌuic a tsʌnsan jini simaroñoꞌ bʌ, Putsꞌtyanla tic tyojlel jatyetla laꞌ wujil bʌ tsʌnsʌ.
20Jini muꞌ bʌ i contrajiñet ti leco jax bʌ tꞌan, Miꞌ lolon chan isañob i bʌ.
21¿Mach ba yom c tsꞌaꞌlen jini muꞌ bʌ i tsꞌaꞌleñet, c Yum? ¿Mach ba chꞌʌjyem c pusicꞌal cheꞌ miꞌ contrajiñetyob?
22Mic tsꞌaꞌlen ti pejtyelel c pusicꞌal. J contrajobʌch jeꞌel jini a contrajob.
23Tsajiñon, Dios. Wen qꞌuelbeñon c pusicꞌal. Cʌmbeñon c pensal.
24Qꞌuele c pusicꞌal mi an chʌ bʌ machꞌʌ wen. Pʌyʌyon majlel tiꞌ bijlel j cuxtyʌlel machꞌʌ yujil jilel.
