1Dios miꞌ wen pʌsbeñob i yutslel israelob. Melel miꞌ pʌsbeñob i yutslel jini sʌc bʌ i pusicꞌal.
2Pero joñon tij colel cʌyeꞌ c chꞌujbin Cheꞌ bajcheꞌ maꞌix xucꞌul coc, colel i tyʌjtsꞌel.
3Tic lolon mulʌbe i wenlel jini muꞌ bʌ i chanꞌisañob i bʌ Cheꞌ ñac ti quilʌ chʌncol i wen ocꞌan chʌ bʌ an i chaꞌan jini simaroñoꞌ bʌ.
4Machꞌan mi yubiñob wocol. Chꞌejlʌch i bʌcꞌtyal.
5Machꞌan mi yubiñob wocol bajcheꞌ yañoꞌ bʌ quixtyañujob. Machꞌan mi tyʌcꞌlʌntyelob cheꞌ bajcheꞌ i piꞌʌlob.
6Jin chaꞌan ñoj weñʌch miꞌ qꞌuelob i bʌ. Miꞌ chajpañob i pusicꞌal i chaꞌlen simaronlel cheꞌ bajcheꞌ xꞌixicob miꞌ chꞌʌlob i bʌ ti ujʌl yicꞌot bujcʌl.
7Machꞌan chʌ bʌ tyo yom i chaꞌañob. Butꞌulob i pusicꞌal ti lolon jach tyac bʌ.
8Miꞌ chaꞌleñob wajleya yicꞌot alꞌeya. Miꞌ bʌcꞌtisañob i pꞌʌlob. Chꞌejlob i pusicꞌal miꞌ subob chʌ bʌ mi quej i melob.
9Miꞌ tyajob Dios ti machꞌʌ wen bʌ tꞌan. Miꞌ pucob ti pejtyelel mulawil chʌ bʌ miꞌ lolon pensaliñob.
10Jini i chaꞌañoꞌ bʌ Dios miꞌ lolon chꞌujbibeñob i tꞌan jini simaroñoꞌ bʌ. Tsijcꞌ cheꞌob i pusicꞌal. Miꞌ lolon jacꞌbeñob i tꞌan cheꞌ bajcheꞌ miꞌ japob jaꞌ cheꞌ tyʌquin i tiꞌ.
11Mi lolon alob: Mach yujil Dios chʌ bʌ mucꞌob. ¿Bacan miꞌ pꞌisonla tiꞌ wenta jini ñoj ñuc bʌ? Cheꞌ miꞌ lolon alob.
12Qꞌuele awilan, jiñʌch jini machꞌʌ baꞌan ochem tiꞌ tꞌan Dios, muꞌ bʌ i wen ocꞌan chʌ bʌ an i chaꞌañob. Maꞌan majch miꞌ ticꞌob.
13Ti cʌlʌ lolon jach chʌncol j cʌñʌtyan c pusicꞌal. Lolon jach mij cʌñʌtyan c bʌ chaꞌan mi cajñel ti sʌc.
14Cꞌʌlʌ mi sʌcꞌan cꞌʌlʌ mi yicꞌan añʌch c tyʌcꞌlʌntyel. Mi cubin c tyojꞌisʌntyel ti jujumpꞌej qꞌuin.
15Tsaꞌic c yoque subeyob a chaꞌañoꞌ bʌ chʌ bʌ tic lolon ñaꞌtyʌ tic pusicꞌal Tiꞌ sʌtyʌyob i bijlel chaꞌan ti caj c tꞌan.
16Cheꞌ ñac tic pensali i sujmlel bajcheꞌ añob Mach chꞌujbi c ñoj chꞌʌmꞌen isujm.
17Jintyo ti ochiyon ti chꞌujul bʌ i templo Dios. Yaꞌi tic pensali chʌ bʌ mi quej i yʌqꞌuentyel i ñusan jini simaroñoꞌ bʌ cheꞌ ti jilibal.
18Melel, ñoj bʌbʌqꞌuen mi yajlelob yaꞌ baꞌ waꞌalob. Jatyet, Dios, mi quej a junyajlel jisañob.
19Ti ora jach mi jilelob. Mi waꞌ tyʌlel jini bʌbʌqꞌuen tyac bʌ.
20Lajal i cuxtyʌlel bajcheꞌ ñajal muꞌ bʌ i waꞌ ñajʌyel lac chaꞌan cheꞌ tyejchemonla. Cheꞌ mi tyejchel mi quejel i ñaꞌtyañob i sujmlel.
21Cheꞌ ñac tic chꞌʌmbe i sujmlel, ñoj chꞌʌjyem ti cubi. Tic chaꞌle pensal.
22Ti queji c ñaꞌtyan lajalon bajcheꞌ tonto bʌ quixtyañu. Lajalon ti a tyojlel bajcheꞌ animal machꞌʌ baꞌan i ñaꞌtyʌbal.
23Pero mach cheꞌic maꞌ qꞌuelon. Bej añon quicꞌotyet ti pejtyelel ora. Chucul a chaꞌan jini ñoj bʌ j cꞌʌb.
24Mi quej a bej tyojꞌisañon majlel ti a tꞌan cheꞌ wʌ tyo añon ti mulawil. Ti wiꞌil mi quej a pʌyon majlel ti a panchan am bʌ i ñuclel.
25Machꞌan yambʌ muꞌ bʌ c chꞌujbin yaꞌ ti panchan. Com jatyet jach wʌꞌ ti mulawil, mach com yambʌ.
26Machꞌañix i pꞌʌtyʌlel c bʌcꞌtyal yicꞌot c pusicꞌal. Pero Dios i pꞌʌtyʌlelʌch c pusicꞌal. C chaꞌañʌch ti pejtyelel ora.
27Qꞌuele bajcheꞌ mi jilelob jini muꞌ bʌ i jis i bʌ baꞌañet. Mi quejel a jisan pejtyelel muꞌ bʌ i cʌyetyob.
28Pero joñon mic tyaj c wenlel cheꞌ mic lʌqꞌuet c Dios Tsaꞌix c xucꞌchoco c bʌ ti jatyet Chaꞌan chꞌujbi c sub pejtyelel a melbal.
