Salmos 118

1

2

8

19

22

23

34

37

40

46

51

73

90

91

95

100

102

103

117

118

121

131

135

138

139

146

150

¹Subenla wocox i yʌlʌ lac Yum, como ñoj wen lac Yum. Ti beleꞌ ora an i yutslel i pusicꞌal.

²Laꞌ i yʌlob jini israelob: Ti pejtyelel ora an i yutslel i pusicꞌal lac Yum, cheꞌob.

³Laꞌ i yʌlob i jiñʌjlelob Aarón: Ti pejtyelel ora an i yutslel i pusicꞌal lac Yum, cheꞌob.

⁴Laꞌ i yʌlob jini muꞌ bʌ i chꞌujutisañob lac Yum: Ti pejtyelel ora an i yutslel i pusicꞌal lac Yum, cheꞌob.

⁵Cheꞌ ñac ti cubi wocol tic pejcʌ lac Yum, Tiꞌ jacꞌbeyon, ti yʌcꞌʌyon ti cojlel.

⁶Lac Yum an quicꞌot. Machꞌan mi quej c bʌcꞌñan chʌ bʌ yes miꞌ tyumbeñoñob quixtyañujob.

⁷Lac Yum mi yajñel quicꞌot. Mi yʌqꞌueñon c pꞌʌtyʌlel. Mi quej j qꞌuel i jilibal jini muꞌ bʌ i tsꞌaꞌleñon.

⁸Yom mi lac xucꞌchocon lac pusicꞌal ti lac Yum. Mach yom mi lac xucꞌchocon ti quixtyañujob.

⁹Yom mi lac xucꞌchocon lac pusicꞌal ti lac Yum. Mach yom mi lac xucꞌchocon ti yumʌlob.

¹⁰Jini simaroñoꞌ bʌ ti jujumpꞌej pañimil tiꞌ joyoyoñob. Tiꞌ cꞌabaꞌ lac Yum mi quejel c ganariñob. Wocox i yʌlʌ lac Yum muꞌ bʌ i cotyañonla.

¹¹Tiꞌ joyoyoñob. Melel, joyolon i chaꞌañob. Pero tic ganariyob tiꞌ cꞌabaꞌ lac Yum.

¹²Jomjomñayob tic tꞌejl cheꞌ bajcheꞌ i ñaꞌ chab, Colel i pulon cheꞌ bajcheꞌ chꞌix muꞌ bʌ ti lejmel tic joytyʌlel Tiꞌ cꞌabaꞌ c Yum tic ganariyob.

¹³Wen ñetꞌelon, colel c yajlel, Pero lac Yum tiꞌ locꞌsʌyon.

¹⁴Lac Yum c pꞌʌtyʌlelʌch. Jiñʌch muꞌ bʌ j cꞌʌyin. Jiñʌch ajcotyaya c chaꞌan.

¹⁵Ubinla jini tijicña bʌ tꞌan tiꞌ chumlib jini tyojoꞌ bʌ. Como ti lac ganari tiꞌ pꞌʌtyʌlel lac Yum.

¹⁶Wen ñuc i pꞌʌtyʌlel lac Yum. Chaꞌan tiꞌ pꞌʌtyʌlel lac Yum mi lac ganarin.

¹⁷Machꞌan mi quej c sajtyel. Cuxul mi quej cajñel. Mi quej c sub i melbal lac Yum.

¹⁸Lac Yum tiꞌ wen tyojꞌisʌbeyon c pusicꞌal ti wocol, Pero maꞌan mi yʌcꞌon ti sajtyel.

¹⁹Jambeñon i puertajlel Templo yaꞌ baꞌ mi yochelob jini tyojoꞌ bʌ, Chaꞌan mi cochel cʌqꞌuen wocox i yʌlʌ lac Yum.

²⁰Jiñʌch i puertajlel lac Yum baꞌ mi quejelob ti ochel jini tyojoꞌ bʌ.

²¹Mic subeñet wocox a wʌlʌ como ti a jacꞌbeyon. Ti ochiyet ti Ajcotyaya c chaꞌan.

²²Jini tyun tsaꞌ bʌ i chocoyob jini ajmel tyun bʌ otyot ti ochi tiꞌ wentyʌlel oy ti xujcꞌ otyot.

²³Jiñʌch i chaꞌlibal lac Yum. Tyoj bʌcꞌñʌjel mi laj qꞌuel jini tsaꞌ bʌ i chaꞌle.

²⁴Ili bʌ qꞌuin i melbalʌch lac Yum. Laꞌ la cubin tijicña. Yom tijicña mi la cajñel.

²⁵C Yum, awocolic, cotyañon lojon. Awocolic c Yum, laꞌ loqꞌuic ti wen chʌ bʌ mi lojon chaꞌlen.

²⁶Cꞌajacña i yoj jini muꞌ bʌ i tyʌlel tiꞌ cꞌabaꞌ lac Yum Wʌꞌ ti a wotyot, c Yum, mi lojon c chꞌujutisañet.

²⁷Jiñʌch Dios lac Yum. Ti yʌcꞌʌ i sʌclel mulawil ti lac pusicꞌal. Cʌchʌla ti chꞌajan tsʌnsʌbil bʌ i majtyan Dios yaꞌ ti yajnib i majtyan.

²⁸Jatyet c Dioset, mi quej c subeñet wocox a wʌlʌ. C Dios, mi quej c pʌs a ñuclel.

²⁹Subenla wocox i yʌlʌ lac Yum, como ñoj wen lac Yum. Ti pejtyelel ora an i yutslel i pusicꞌal.