1Yawe, ni kariimet memek bitawara mu koma memek nungara ko Kaem; buta se ni ka gemang magara nunga kasuru se arigimonko.
2Kaem, ni kariimet nunga tutera ko Kaem, bares ale nunumi patawura ko kariimet ewere koma memek nungaruko.
3O Yawe, tom awila nunguningkiri kariimet memek bitawara wore amilmil te bagamonko? Nononga tom awila aniso?
4Nuna nunumi patawura ko den balu balu geragasan; ale nunumi ninguru patawusan.
5Yawe, nuna nika kariimet nunga eresan nongorak kapasan, kariimet nika ma nunga balem wore nunga bita maguwusan.
6Nuna imet gera mu se, kariimet iwareng tai nangarak bagara mu nunga mosan se kuesan, kuriang marmar mu agotala nunga mosan se kuesan.
7Ale balsan, “Yawe me arigiso; Jacob ko Kaem mel ana bitawasan mu tawun biya me ko ikia taso,” masan.
8Nina kariimet sikina alo, awuk se suwutata nguala sipa lagasan? Nina amaru te ikia ningo tal ale sinararalko?
9Kaem nu ana nadogowa nungam mu nu kota due mena agi? Nu tala namotam nungam mu nu kota motam mena agila?
10Kaem ali lilim munan tuiwoso mu, memek koma bu me ningaruk agi? Nu ali lilim ko kausa kari se, awuk, nu kota pa ikia ko tukunangaram agi? Mena.
11Yawe nu kariimet suen la nunga ikia mu iki ari saposo; nu ko ikiso mu nononga ikia mu mel yam iwita.
12O Yawe, kariimet ni ka munan den te nunga kiti gurugusam ale nunga dingumusam mu amilmilamonko.
13Nuna ikup gisan, bare ni nunga sangorsam, ale nongorak bagasam la, kager kari memek mu mutim ningi nama sapasan.
14Yawe ko kariimet me ta nunga bitiruk ale me ta buring gurugu nungarukko, mena.
15Buta se ikup te nunga ko munan mu aking diram la aratuk se kariimet munan diram la karo tusan mu amilmilamonko.
16Awiri ani ago ko barasuk ale kager kari memek nunga menawurokko? Awiri ani ago ko sanamaruk ale kiwem memek betera ko kariimet nongorak barimarukko? Kariimet bo mena. Yawe kota suanta.
17Se nu ani me aga saongam le mu, ani maingkala kuera mutim ningi aniwasam le.
18Ani asiwik palengam se “dagulasam” maem, bare Yawe, ni kua aisem ale agiting duap ningi aga iluwem.
19Tom ani angamang motam kapakaso se magiwakasam mu, ni angamang motam patawukasam ale amilmil aisukasam.
20Ni memek bitawara ko kari supuling mu nongorak me nimi kiting ilusam; nunga bitua bowa ningi mu kariimet ikup memek ari gilingisan.
21Nuna kariimet kiwem memek betesan mu nunga sangorsan ale kariimet ningo mu kuera mateng ko lage te nunga betesan se kua namasan.
22Bare Yawe mu aninga ngatalek aora; aninga Kaem mu aninga manga gek am, ani te aimi kaluwusam.
23Nu nunga kiwem memek mu ko koma memek nungaruk ale nunga maguwurokko; Yawe, anananga Kaem, mu nunga menawu saparukko.
