1Yawe sor suen la bitaruwoso, buta se sor suen la nguangamon ale barowara mamonko; nu ko daiga kuwim te daigam se engel bibiya nu laturman ale bagasan, buta se ali lilim uririkirokko.
2Yawe ko sokel Zion ningi mu kalel biya; sor suen la mu noko nup patawusan.
3Nuna suen la noko nup biya se yawarakala mu yam patawumonko. Nu laili pempem bagoso!
4Nu mu anananga King sokel garagar; nu diram la tutera ko kiwem mu ko kueso ale ko sail tagiso; ale nu munan ningo se kiwem diram mu ana Israel nanga ningi beteram.
5Buta se Yawe, anananga Kaem, ko nup kalel biya patawunak ale suwik duap ningi nabugura kulukurnak ale perr tunakko, mu awuk, nu laili nunguningkiri.
6Moses se Aaron mu noko priest nunga ningi karogo bagakasan, se Samuel mu nunga bo tala, nuna Yawe arukasan se nuguring ilukaso.
7Nu taiti nuwi ningi baga se nongorak munakakaso; se nuna noko munan den nungaram mu karo tuikasan.
8O Yawe, anananga Kaem, ni ka kariimet nuguring ilukasam; ni Israel ko memek siwura ko Kaem; tom nuna memek bitakasan mu ni bu nungarukasam, bare aking nunga gikasam ale nunga memek siwu nungarukasam.
9Buta se ana Yawe, anananga Kaem, ko nup kalel biya patawunak ale noko duruk laili mu te nabugura kulukurnak ale perr tunakko, mu awuk, Yawe, anananga Kaem, mu laili nunguningkiri.
