1(David ko ngatang bo) O Yawe, ani memek bo me betera, se aga wosenga ewere iki ale aga sangaruko! De gurugu ale ikiko, ani nunguningta balsam.
2Nika motam sinar mu te ani aga gurugu patawur ale ani angimik den bo mena mu ko aga wetang saparko.
3Ni tirom tair ale aga angamang motam ningi tatager, mu ni memek bo me arikko; ani agiring te den kawel bo me aratam.
4Ani nika den ilukuawukasam, ale kager daong ko kari nunga munan kawel mu te me dagulukasam tala.
5Ani pempem nika molak diram la karo lagakasam, ale katir me paguwukasam.
6Aga Kaem, ni ani agiring ilusam, bore te se aninga aira nikate betesam; de gurugu ale agiring ikiko.
7Kariimet kager daong ko nagusan kete taisan mu ni ka kiting te nunga iramursam. Butatala, ka kua aisa ko munan ningo mu wetang sapar ale te aga sangaruko.
8Nika motam ko ninguru sinar tasam iwitatala, aninga sinar toko; tarak nuam ko luman te ko gotek nunga ereso iwita, aga ira kaluwurko.
9Aga bitaru se kari memek me aga maguwumonko, mu awuk, kari memek nunguningkiri aga talurman bagasan.
10Nuna bo kua tuata ko munan me ko ikisan; nuna nunumi patawura ko den balu lagasan.
11Nuna ani te bagasam mu ko ikiman ale aga laturu gilingiman, ale aga ilu talipamonko kimi bitawasan.
12Nuna lion iwita yumuman ale inang moa namonko karanga sipa se loagakuawuwasan.
13Yawe, bares ale nongorak kagerer ale nunga menawurko; ka batir te kari memek nunga moar ale aga bataguru toko.
14Nika sokel aora garagar mu te aga sangaru toko. Nononga ikia nongomang motam mu na nokoyam ali ewere ko melmasak te aniso; buta se nunga memek koma mu inang iwita ninguru nungaru se namon ale nutagu lagarukko, nunga kuriang imas gue te koma suanta tala bitarko.
15Se ani mu angimik den mena, owore te se ani nika motam te bagarikko; se tom ani maragarik mu aninga angamang motam amilmilarukko, mu awuk, ani nika kiwim te kerak bagasam.
