1(Asaph wur imi batogam) Judah sor te Kaem ko ikisan; se Israel ningi mu noko nup mu biya.
2Noko wonong mu Salem aniso; se Zion mu noko bagara kuwim.
3Umu te nu gatu kore tamatama mu biagaram; nu karem se saenang mel suen biya mu kulukumuram ale menawuram.
4Ni keta nikim biya karogo; ni King Biya, se duruk bibiya sokel ago mu ni nunga kiarem.
5Ni te se kager ko kari aora aora mu dagulu kua sapaman se ni nunga kager ko melmasak mu gi saperem; se bo kasagarukko me terong.
6O Jacob ko Kaem, ni sail karogo balem ale iningirem, se kager kari nunga horse karogo dagulu sor kutek ma saparam.
7Ni keta suanta kariimet suen la ninguru ka nguanga gilingisan! Ni gemang magaruk, mu awiri ni kema te sanamarukko terong? Mena.
8Ni duruk wonong te baga se kariimet nunga tutera ko den mu ni balem, se ali lilim den mu ikiam ale nguangaram ale sor kutek ma saparam.
9Ni barasu sanamerem ale kariimet memek bitawara mu nunga memek koma nungarem, ale nika kariimet nunga bita maguwuwaman mu nunga giem.
10Kaem, ni kari ko gomang magara nikate beteso mu gurugusam se nika nip biya eng am biyala kisiso; se kariimet nika gemang magara ningi ikup bo me arigiman mu nguanga se nika nip patawumonko.
11Buta se, ni mel bo Yawe nika Kaem bita tuiko balu mu, eng am uwutata bitarko. Sor suen la nu kota suanta ko nguanga se taimon munan tumonko.
12Nu king nusupuling lagara mu nunga nosokel karogo kaposo; se ali ko king suen la ko nguangasan.
