1(David ko wur) Yawe, ani nikate tairem, ni aninga bitaru se kari memek nuguting te memek me arigek ale dolirikko; nika munan diram te aga bataguru toko.
2Ni aninga guranek iki ale pasak ala aga bataguru toko; ni manga bo duruk iwita bagasam, se ani nika ningi yumurekko; ni aninga laturu se ani terong bagarik se kager kari me ta aga maguwumonko!
3Nunguningta, ni aninga kuwim yumura, se ni aninga sinar tasam; se nika nip ningo mu ko iki se aga diruwur ale lage ningo mu te agarak namarko.
4Kari memek dagarok kira gilingiman, ani te aga ilumonko, bare ni aninga sinar to se ani te memek me arigekko, mu awuk, ni aninga manga gek am.
5O Yawe, ani agata aimi ni kiting te betesam; ni kiwem nunguning la betera ko Kaem, ni aninga bataguru toko.
6Ani kariimet kaem kawel nunup patawusan mu me nunga kuesam; bare Yawe, ani mu nikate la ira sanami lagasam.
7Ni pempem la aninga kua lagasam, buta se ani nika amilmila lagarikko; mu awuk, ni aninga ikup yaman am ari ko iki saperem ale aga sangem.
8Ni kari memek nungarkiwerem se nuna me aga talipaman, mena; ni aninga sangem se ani asiwik sor ipi ningo mu te beterem.
9O Yawe, ni ani ago ko gemang batagukko, mu awuk, ani ikup biya ningi kaperem; ani nia mo lagerem ale amotam duap laga saparam, se angimik sokel menaram.
10Aninga ikup imi kumik menara mena ko iwita, se aga ma niara imi te pasak ala kua namarikko agila pa; ikup memek oworete ani angimik sokel menaram ale angimik galugaluk aram.
11Kari memek alo owore nungumik te se, aga bagara suan agarki patesan, se aga tiran gar alo mu mel memek bo iwita agarki gilingisan, ale lage te agarkasan mu nuna nagu gilingisan.
12Nuna ani ago ko nungamili saparam, o kari maingkala kua namaram iwita; ani kani papak mam se waru sapaman iwita.
13Kari memek abiring ko munakasan mu ani ikisam; nuna ani nguangara bo karogo aisimonko karogo kaesan; ale den ningi aga betemon ale aga momon se kuerikko karogo kaesan.
14Bare Yawe, ani nikate la ira sanami lagasam; ale balsam, “Ni aninga Kaem,” masam.
15Ani ni kiting te pempem la bagasam; ni kari memek aninga momonko aga karowasan umu nuguting te aga bataguru toko.
16Ani nika ura kari, se ni gemang aisuko; nika kua aisa ko munan yawara mu te aga sangaru toko.
17Yawe, ani nika arusam, ni kari memek me nungarki sager se dolara aisimonko; ni nuna dolara ikup memek ningi nunga waru se, kua paranga mutim ningi namamon ale sor kutek maukko.
18Nuna kawel kari, nunumi patawusan ale nusupuling lagoso se kariimet ningo diram mu nunga den dolara balsan. Ni nuguring kalo se sisirokko!
19O Yawe, ni kariimikiri saki nongoma te, kariimet ni bowa ningi nagu tai yumusan mu nika mel ningo ningo nungem mu nungaru gurugusam.
20Ale kimik duap te nunga kaluwusam, se kari nunga bita maguwumonko den kalosan mu me ta nunga bita maguwumonko, ale kari den te nunga atumumonko mu nunga maguwumonko me terong tala.
21Ani Yawe nup patawurikko, mu awuk, nu ani tawun biya aga kueso; se tom kager kari aninga karoman ale aga maguwumonko, mu nu aninga saongam se ani noko sokel te terong bagasam.
22Ani ninguru nguangakasam, ale ikikasam mu ni aninga beterem ale awar biya bagasam iwita ko ikikasam; bare tom ani nikate wosengem, mu ni aninga niara ikiem ale aga sangem.
23Buta se nina Yawe ko kariimet, nina noko ninguru ko kua tualko! Nu kariimet nu la karo tui lagasan mu ninguru nunga bitarso, bare nu nusupuling lagara ko kariimet mu koma memek nungarso.
24Nina Yawe ko kariimet nukote la loaga lagasan, nina nengemang ningi gek am sanamaralko.
