1Ana Yawe ko nup patawunakko! Kariimet noko nguangasan, ale noko munan den ko kuesan, mu amilmilamonko.
2Nononga kuriang imas mu sokel ago se nunup agotala nunga ali te baga se nunga gue te marak yawara kapa nungarukko.
3Nunga bagara te mu nungumik mel ago bagamonko; se nononga kiwem ningo diram mu butata pempem la anirukko.
4Sor tiromorom ningi ta wore, kariimet ningo diram mu nikinang te bagamonko, mu awuk, nuna kariimet saki nongomang nungaru se, marolila te arungu baga se, munan ningo diram te la bagasan.
5Kariimet nongomang motam ningo amilmil te saki alo mel nungarsan, ale kiwem ningo diram mu bita se nunga bagara aolak ko sinar tasan, mu yawarakala baga se lagamonko.
6Mu awuk, kariimet munan umu karo tui lagasan mu me ta dagulamonko; se kariimet saki alo kariimet umu nunga kiwem ningo mu ko balu se lagamonko.
7Nuna ikup duap duap ko den ikisan bare me ta nguangasan; mu awuk, nunga nongomang biya mu, Yawe kote la loaga se lagasan.
8Nunga nongomang motam mu me ta uririkiso, se nuna me nguangasan; mu awuk, nuna uwutata sokel karogo amilmil te baga se nunga kager kari memek tamon mu nungarkamonko.
9Nuna amilmil te nunga melmasak kituwura guat alo nungarsan gurugusan; nononga kiwem ningo diram mu butata pempem la anirukko; se kariimet nunga kiwem umu ko nunga balu se lagamonko.
10Se kariimet memek bitawara mu kiwem imi arigimon ale nongomang magaruk se, nogore usimon se gigek mauk se nongoma kaluwu namamonko; ale nuna mel ko nongomang bita lagaman mu me ta tamonko.
