1Ani Yawe ko kuesam, mu awuk, ani nu aninga sangukko aurem, se agiring ikiam ale gomang aisam.
2Nu aninga aira ikiam ale aga saongam owore te se, ani ali imi te baga se mu, ani pempem nu aru ngatangaru se lagarikko.
3Ani ikup se angamang bataga niara aga iramuram, ani kua namarikko pingi arem.
4Bare ani Yawe nup te airem, “O Yawe, aga sangaruko!” maem.
5Yawe mu munan nuam, gomang nangara ko Kaem; nu ninguru nanga kueso.
6Nu kariimet nu kota suanta te la ira sanami lagasan mu nunga sangarso; se ani ikup biya ningi kaperem mu nu aninga saongam.
7Aninga angamang motam aitak kua kaparam, mu awuk, Yawe ani ago ko ningo beteram.
8Mu ni, O Yawe, ani memek ningi aga bataguru taem; ni aninga amononge siwurem, ale aninga sangem se me dagulem.
9Se ani ali imi te baga se mu, ni la karo kisekko.
10Ani ko ikiem, ikup memek aga iram, ale balem, “Kariimet suen la mu am kawel gurum la,” maem, bare aga nguangara mu ningi ni te sokel ago am sanamiwakasam.
12Yawe ani ago ko ningo beteram, se anape mel ningo nu tuekko?
13Ani agiting patawurik ale nu aga sangaru tam mu ko amilmil tui se,
14ko kariimet nomotam te den ilak balem mu karo tuekko.
15Yawe ko kariimet mu noko gomang motam, se bo magoso mu nokote mu mel aromemek.
16O Yawe, nunguningta ani nika ura kari; aninga ayam nika ura imet bagakaso iwitatala, ani ka ura kari bagasam; ani mayang singir aga taliparam, bare ni bataguru guila warem.
17Ani munan amilmil kisek ale nip patawurikko.
18Ale den kerak balem mu karo tuekko. Nunguningta, ani Yawe ko kariimet nomotam te,
19ni Jerusalem ka temple ningi, kuwim laili mu te Yawe amilmil tuekko. Ana Yawe ko nup patawunakko!
