Olcueih 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Pa kah thuituennah te ca rhoek loh hnatun saeh lamtah yakmingnah dang hamla hnatung saeh.

²Nangmih taengah aka then rhingtuknah kam paek coeng dongah ka olkhueng he hnoo boeh.

³Ka camoe vaengah a pa taengah mongkawt la, a nu mikhmuh ah oingaih cangloeng la ka om.

⁴Te vaengah kai n'thuinuet tih kamah taengah, “Ka ol he na lungbuei ah dueh lamtah ka olpaek ngaithuen neh hing puei.

⁵Cueihnah te lai lamtah yakmingnah khaw lai lah. Ka ka dong lamkah olthui he hnilh boeh, phaelh boeh.

⁶Cueihnah te hnoo boeh, na lungnah daengah ni namah te n'ngaithuen vetih nang te n'kueinah eh.

⁷Cueihnah he ni tanglue, cueihnah he lai lamtah na hnopai boeih nen khaw yakmingnah he lai lah.

⁸Cueihnah te picai lamtah namah te n'pomsang bitni. Namah te n'thangpom atah amah te kop van.

⁹Na lu dongah mikdaithen kah lukhueng la om vetih nang taengah boeimang rhuisam han tloeng ni.

¹⁰Ka ca ka hnatun lamtah ka olthui he doe lah. Te daengah ni na hingnah ah kum loh nang hamla a puh eh.

¹¹Cueihnah longpuei neh nang te ka thuinuet vetih namtlak then ah nang te kan cuuk sak ni.

¹²Na caeh vaengah na khokan loh puenca pawt vetih na yong vaengah tongtah mahpawh.

¹³Thuituennah te tu lamtah hlong boeh, na hingnah hamla kueinah.

¹⁴Halang kah caehlong ah pongpa boeh, boethae rhoek kah longpuei dongah uem puei boeh.

¹⁵Te te dul laeh, a taengla paan boeh. A taeng lamloh taengphael lamtah khum tak.

¹⁶Thaehuet pawt atah ip uh tloel dae a ih loh a hmil atah hlang paloe sak ham te paloe sak uh thai pawh.

¹⁷Halangnah buh te a ang uh tih kuthlahnah misurtui tul uh thae.

¹⁸Khothaih kah koshae a cikngae vanbangla aka dueng kah caehlong khaw khosae kah a aa bangla a thoeng pah.

¹⁹Halang rhoek kah longpuei tah khohmuep bangla om tih mebang neh a tongtah khaw ming uh pawh.

²⁰Ka ca, ka ol he hnatung lamtah ka olthui he na hna kaeng lah.

²¹Na mik long khaw khohmang boel saeh lamtah na thinko khui ah te te ngaithuen.

²²Te te aka hmuh rhoek ham tah amamih kah hingnah neh a pumsa boeih ham khaw hoeihnah la om.

²³Na lungbuei te kueinah khingrhing lah hingnah kah a dawn tah te lamkah ni.

²⁴Ka dongkah olhmaang te na taeng lamloh thaek lamtah hmuilai dongkah olrhong oling khaw namah lamloh lakhla sak.

²⁵Na mik loh phek paelki saeh lamtah na mikkhu loh namah hmaiah buelh dueng saeh.

²⁶Na kho ham namtlak te saelh pah saeh lamtah na longpuei khaw boeih cikngae saeh.

²⁷Banvoei bantang la phael boeh, na kho te a thae dong lamloh hoeptlang lah.