Odommu 1:1-20

¹Mí mPɔɔri, Yesu kóo tɔ̃ntì míì di wɑ̃̀ri di mpɑ́tíri, Kuyie nkuù n yu kɛ n tɑ̃ɑ̃tɛ́ kɛ n dɔ̀ɔ̀ ku kó ditɔ̃nnì kɛ̀ m bo nɑ́kɛ́ ku nɑ́ɑǹsɑ̀ɑ̀tì.

²Kù do nɑ̀kɛ́ tìì kpɛ́í ku pɑ̃ɑ̃nɑ́ɑǹtì nɑ́ɑm̀bɛ̀ nɛ̀ dimɔ̀nnì kɛ̀ bɛ̀ tì wɑ̃̀ri.

³Tì nɑ̀ɑ́ nti Yiɛ̀ nYesu kpɛ́í nkɛ wèè tùótɛ́ tinitikɔ̃̀ntì kɛ̀ bɛ̀ ò pɛitɛ́ Dɑfiti kó kufuku miɛkɛ.

⁴Kɛ̀ Kuyie nhò duɔ́ mmuwɛ̃rímú kɛ̀ Muyɑɑ́nsɑ̀ɑ̀mù duɔ́ nkòo yɑ̃̀ńtɛ́ kɛ bɛnkɛ ò tumɛ̀ ku Birɛ.

⁵Weè te kɛ̀ Kuyie nni ndɔ̀ɔ̀ mɛsɑ̀ɑ̀ kɛ̀ n nɑɑ́ nku kó ditɔ̃nnì kɛ bo yṹɔ̃́nní ibotí imɔu kɛ̀ ì nhò tɑ̃́ kɛ́yíé nho kpɛti.

⁶Díndi Odommu kɔbɛ di tú iì botí kó bɛ̀mɑbɛ̀ kɛ̀ Kuyie ndi yu.

⁷N di dɔummu díndi, Kuyie ndɔ́ bɛ̀, kɛ di tɑ̃ɑ̃tɛ́, kɛ̀ di bo nfòù kù dɔ́mɛ̀. Ti cicɛ Kuyie nnɛ̀ ti Yiɛ̀ nYesu Kirisi bɛ̀ di pɑ̃ mɛsɑ̀ɑ̀ nnɛ̀ diwɛ̀ì.

⁸N sɑ̃ntí Kuyie nnɛ̀ Yesu Kirisi kó diyètìrì di kpɛ́í, nkɛ yɛ̃́ nh ɔ̃ɔ̃ kɔtɛ kɛ̀ɛ̀ bíɛ́kɛ̀ kɛ̀ bɛ̀ n nɑ́ɑ́mmu di tɑ̃́ mɛ̀ɛ̀ botí Kuyie.

⁹M bɑ́ɑ́mmu Kuyie ndi kpɛ́í nsɑ̃́ɑ̃̀ kɛ̀ kù yɛ̃́, kunku m pĩ́ nkùù tɔ̃mmú nɛ̀ n yɛ̀mmɛ̀ mɛmɔu kɛ nɑ́ɑ́ nku Birɛ kó Tinɑ́ɑǹsɑ̀ɑ̀tì.

¹⁰M bɑ́ɑ́mmu Kuyie nsɑ̃́ɑ̃̀, kɛ tú kɛ̀ kù dɔ́ kù m pɑ̃ kucɛ kɛ̀ n kɔtoo di ciɛ.

¹¹N do dɔ́ kɛ di yɑ̀mu kɛ́ di nɑ́kɛ́ Kuyie nkó yɛpɑ̃rɛ̀ mɑyɛ̀ kpɛ́í nkɛ̀ dɛ̀ɛ yie nkɛ̀ di kpenkɛ Kuyie nkó kucɛ miɛkɛ.

¹²Kɛ wɛ̃̀tɛ kɛ do dɔ́ tí mɑ́ɑ́ kɛ́yɑ́úkùnnɛ titɔbɛ̀ kɔ̃̀ntì, kɛ yɛ̃́ timɔu ti wɛ̃ḿmɛ̀ kɛtɑ̃́ Kuyie.

¹³N kɔbɛ n dɔ́ dí nyɛ̃́mu n do dɔ́mɛ̀ kɛ́kɔtoo di ciɛ kɛ di nɑ́kɛ́ Kirisi kpɛti kɛ̀ di tì yie, kɛ́ndò n tì nɑ̀kɛ́mɛ̀ ibotí tɛì kɛ̀ ì tì yie.

¹⁴N kó mutɔ̃mmú mmu n dò nkɛ́pĩ́ mmù bɛ̀ɛ̀ tú Kɛrɛkibɛ nɛ̀ bɛ̀ɛ̀ í tú Kɛrɛkibɛ, bɛ̀ɛ̀ yɛ̃́ yɛpɑ́tɛ nɛ̀ bɛ̀ɛ̀ í yɛ̀ yɛ̃́ bɛ cuokɛ̀.

¹⁵N dɔ́ tì tú m bo di nɑ́kɛ́mɛ̀ Tinɑ́ɑǹsɑ̀ɑ̀tì díndi bɛ̀ɛ̀ bo Odommu.

¹⁶Kɛ yɛ̃́ ifɛi í m bonɛ̀mɛ̀ m bo nɑ́kɛ́mɛ̀ Tinɑ́ɑǹsɑ̀ɑ̀tì, tì tú Kuyie nkó muwɛ̃rímú mmu, kɛ dɛɛrí bɛ̀ɛ̀ kó dimɑ̀ɑ̀ tì tɑ̃́ kɛ́ketɛ́nɛ̀ Sifubɛ borɛ̀ nɛ̀ bɛsɔmboo.

¹⁷Kuyie nhɔ̃ɔ̃ wénkùnnɛ onìtì ò tɑ̃́ dìì mɔ̀nnì ndi nɛ̀ o yɛ̀mmɛ̀ mɛmɔu. Tì wɑ̃̀rimu kɛ tú: Wèè wetí ò bo nfòù ò tɑ̃́ mɛ̀ɛ̀ kpɛ́í.

¹⁸Kuyie mmiɛkɛ cɔ́únní kɛĩ́nkɛ̀ bɛnìtìbɛ̀ cɑɑ̀rimɛ̀ nɛ̀ mɛyɛi mbɛ̀ dɔ̀ɔ̀ri mɛ̀ kɛ̀ mɛ̀ dìítí timɔ́mmɔnti.

¹⁹Dɛ̀ɛ̀ dò nkɛ́nte kɛ̀ bɛnìtìbɛ̀ɛ bɑntɛ́ Kuyie ndɛ̀ feímu, Kuyie mmɔ́mmɔnku kuù dɛ̀ mbɛ̀ bɛnkɛ.

²⁰Kuyie nkó mɛdòmmɛ̀ nɛ̀ ku wɛ̃rímú mùù bo sɑ̃́ɑ̃̀ dɛ̀ í dò nnɑ kɛ́yɑ̀. Kɑ̀ɑ nɛ́ wéntɛ́ní kù dɔ̀ɔ̀mɛ̀ kutenkù dɛ̀ feímu kɛ dò ntí nɑ kɛ́ dɛ̀ bɑntɛ́ dɛɛ̀ te kòo nìtì bɑ́ɑ́ nɑ kɛ́peri Kuyie nyììkɛ̀.