MUKÉTÍMÙ 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Dibenni tɑ̃̀nkù yiénwè kó diyiè ketirì di níí tíí nkɛ́ n sɑ̃ntɛ dɛ yiè, di bɑ́ɑ́ pĩ́ mmutɔ̃mmú mɑmù. Disɑ̃nni kó dibɑnni ndi.

²Dɛ yiè di n féútɛ́ dinɑɑdɑɑ̀ nɛ̀ dipedɑɑ̀ nɛ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù, kɛ́ dɛ̀ tùɔ.

³Di wɑɑ́ mbɑ́ fɛ̀ɛ̀ ɔ̃̀fɛ̀ kpɛ́í muyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi dinɑɑdɑɑ̀ ĩ́nkɛ̀, cìdóò bɛ̀kuɔ̀ dipedɑɑ̀ ĩ́nkɛ̀.

⁴Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀.

⁵Kɛ̀ dí kuɔnɛ̀ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ̀ bɛ̀ di dɔ̀ɔ̀ mɛyɛi ncĩ́ɛ̃́mmɛ̀ kó ikuɔ́.

⁶Dɛ kó iwũɔ̃ cɑ̃́ɑ̃́nnɛ̀mu di n feu ì yɛwe yɛmɔu kɛ tuɔ̀ nnɛ̀ di m pɑ̃ɑ̃ mmùù diì nɛ̀ dɛ kó mɛnɑɑ̀. Dɛ kó dipɑ̃nnì níí yó ntú di tuɔ ndì ndi dìì kó kufɔ̃ɔ̃ku n nɑɑti.

⁷Dibenni tɑ̃̀nkù yiénwè kó diyiè píínnì yiè di níí tíí nkɛ́boú dinùù kɛ́ n sɑ̃ntɛ. Di bɑ́ɑ́ pĩ́ mmutɔ̃mmú mɑmù.

⁸Dɛ yiè di n féútɛ́ dinɑɑdɑɑ̀ nɛ̀ dipedɑɑ̀ nɛ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀, kɛ kpɑ kuyɛ̀nkù kɛ́ yɛ̀ nni ntuɔ. Dipɑ̃nnì ndi dìì kó kufɔ̃ɔ̃ku n nɑɑti.

⁹Dí wɑɑ́ mmuyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi dinɑɑdɑɑ̀ ĩ́nkɛ̀, cìdóò bɛ̀kuɔ̀ dipedɑɑ̀ ĩ́nkɛ̀,

¹⁰cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀,

¹¹kɛ́kuɔnɛ̀ dibɔdɑɑ̀ dìmɑ́ɑ̀ mɛyɛi nhũtímù kpɛ́í kɛ̀ bɛ̀ di dɔɔ̀ dɛ kó ikuɔ́, kɛ nɛ́ mbúútí di n fèútɛ́ dì mɛyɛi nhũtímù kó diyiè diɛrì nɛ̀ di n feu ì yɛwe yɛmɔu kɛ tuɔ̀ nnɛ̀ dɛ kó mudiì nɛ̀ dɛ kó mɛnɑɑ̀.

¹²Otɑ̃̀nkù yiénwè kó diyiè tɛpíítɛ̀ nɛ̀ dinummurì, di níí tíí nkɛ́ n sɑ̃ntɛ, di bɑ́ɑ́ pĩ́ mmutɔ̃mmú mɑmù. Di yó mbɑɑ̀ mmí ndi Yiɛ̀ nKuyie n kó dibɑnni ndi kɛ dɔ̀ yɛwe yɛ̀yiekɛ̀.

¹³Diyiè ketirì kɛ́ n féútɛ́ yɛnɑɑdɑkɛ̀ tɛpíítɛ̀ nɛ̀ yɛ̀tɑ̃ɑ̃ti kɛ́tuɔ nnɛ̀ yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. Dipɑ̃nnì ndi dìì kó kufɔ̃ɔ̃ku n nɑɑti.

¹⁴Kɛ̀ di wɑɑ́ mmuyuo mmùù ɑ̃̀ntɛnɛ̀ mɛkùɔ̀ ncìdóò bɛ̀wɛi, bɑ́ dìì nɑɑdɑpɑ̀nnì ĩ́nkɛ̀. Cìdóò bɛ̀kuɔ̀ bɑ́ dìì pedɑɑ̀ ĩ́nkɛ̀.

¹⁵Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀.

¹⁶Kɛ̀ di kuɔnɛ̀ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nɛ̀ dɛ kó mɛnɑɑ̀.

¹⁷Diyiè dɛ́rì yiè dí n féútɛ́ yɛnɑɑdɑpɑ̀ɑ̀ ntɛpíítɛ̀ nɛ̀ yɛ̀dɛ́ɛ̀ nɛ̀ yɛpedɑkɛ̀ nyɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù.

¹⁸Dí nɔ́ɔ́nnɛ̀ tidiitì di ɔ̃ɔ̃ nɔ́ɔ́ nkɛ̀ tì mmɑmɛ̀ bɑ́ fɛ̀ɛ̀ ɔ̃̀fɛ̀ ĩ́nkɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

¹⁹Dí kuɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ́tuɔ nnɛ̀ dɛ kó tidiitì nɛ̀ mɛnɑɑ̀.

²⁰Diyiè tɑ̃ɑ̃́nnì yiè kɛ̀ dí n féútɛ́ yɛnɑɑdɑkɛ̀ tɛpíítɛ̀ nɛ̀ dìmɑ́ɑ̀ nɛ̀ yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù.

²¹Dí yíɛ́nɛ̀ tidiitì nɛ̀ dɛ kó mɛnɑɑ̀, kɛ̀ dɛ̀ mmɑ̀nnɛ̀ yɛnɑɑdɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

²²Dí di kùɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í kɛ́mbúútí di n feu ì yɛwe yɛmɔu kɛ tuɔ nnɛ̀ dɛ kó tidiitì nɛ̀ dɛ kó mɛnɑɑ̀.

²³Diyiè nɑɑnnì yiè dí n féútɛ́ yɛnɑɑdɑkɛ̀ tɛpíítɛ̀ nɛ̀ yɛpedɑkɛ̀ yɛ̀dɛ́ɛ̀, nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù.

²⁴Kɛ̀ dí wɑɑ́nnɛ̀ tidiitì nɛ̀ mɛnɑɑ̀ kɛ̀ dɛ̀ mmɑ̀nnɛ̀ iwũɔ̃ mɑmɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

²⁵Kɛ̀ dí kuɔ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.

²⁶Diyiè nummurì yiè dí n feutɛ́ yɛnɑɑdɑkɛ̀ yɛ̀wɛi, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù.

²⁷Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

²⁸Kɛ̀ di kuɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.

²⁹Diyiè kuɔ́nnì yiè kɛ̀ dí n feutɛ́ yɛnɑɑdɑkɛ̀ yɛ̀ni, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù,

³⁰kɛ́ yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

³¹Kɛ̀ dí kuɔ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.

³²Diyiè yiénnì yiè kɛ̀ dí n feutɛ́ yɛnɑɑdɑkɛ̀ yɛ̀yiekɛ̀, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù.

³³Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

³⁴Kɛ̀ dí kuɔ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.

³⁵Diyiè niínnì yó ntú dibɑnni denni dìì yiè ndi di bɑ́ mpĩ́ mmutɔ̃mmú mɑmù dɛ kó diyiè.

³⁶Dɛ yiè dí n féútɛ́ dinɑɑdɑɑ̀ dìmɑ́ɑ̀, yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ́tuɔ, dipɑ̃nnì ndi dìì kó kufɔ̃ɔ̃ku n nɑɑti.

³⁷Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnɛ̀ dinɑɑdɑɑ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀.

³⁸Dí kuɔ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.

³⁹Kɛ̀ dɛ kó dimɔ̀nnì níí tùɔ̀kɛ di yóó i nni nfíé kɛ́mbúútí di n feu ì di n cɑ̀nnɛnɛ̀ yɛ̀ɛ̀ nɔ̀ kpɛ́í nɛ̀ di n feu ì nɛ̀ diwɛ̀ì nɛ̀ di n feu ì kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀ nnɛ̀ di n feu ì mɛtɑummɛ̀ kpɛ́í.