LUKA 4:29-43

²⁹Ndipo iwo adamuthotha mumzindamo, mpaka pantsonga ya phiri lomwe mzindayo ukadakonzedwa kuti akamugwinyire kuphompho.

³⁰Tsono iye adapsola na pakati pawo aciyenda.

³¹Ndipo iye adabuluka kuKafarnau, kumzinda wa Galileya, acimbawapfundzisa pasabudu.

³²Wanthu wentse akhadabwa na mapfundzisidwe yace thangwe mafala yace yakhana mphambvu.

³³Mnyumba ya kupemberamo mukhana munthu m'bodzi omwe akhana Ciwanda. Ndipo iye adabvundza acikuwa aciti:

³⁴“Nandi Jezu wa kuNazaree! Kodi takucita ciyani ife-pano? Kodi wabwera kudzatipha? Thangwe ine ndin'kudziwa kale kuti ndiwe Wakucena wa Mulungu.”

³⁵Pamwepo Jezu adacikalipira aciti: “Nyamala! Coka mu munthuyu.” Ndipo ciwandaco cidamugwesera pantsi pomwe pakhana wanthu azinji. Ndipo ico ciribe kumucita kuipa.

³⁶Wanthu wentse adadabwa nabzo, acimbabvundzana kuti: “Kodi bzomwebzi bziri kulewa ciani? Iye ali kutonga na bziwanda kubodzi, ndipo iyo icimubvera.”

³⁷Ndipo mbiri yace idabveka kumphimpha zomwezire zentse.

³⁸Jezu adacoka mnyumba ya kupembera, adayenda kumui kwa Simau Pedru. Nakuti mibzala wa Simauyo akhadafesuka. Iwo adakumbira Jezu kuti amuthandize.

³⁹Ndipo iye adakotama pakhana mtendapo, acimulimbisa matendayo. Na tenepo iyo yadapola. Kucokera pamwepo iye adamuka aciyamba kutanaira.

⁴⁰Pomwe kukhadoka, wanthu akhabweresa atenda azinji omwe akhana matenda yakusiyana-siyana. Ndipo iye akhawasanjika manja wentse, acimbawalimbisa.

⁴¹Na winangombo pomwe akhagwa bziwanda, bzicimbakuwa kuti: “Iwepo ndiwe Mwana wa Mulungu.” Tsono iye, akhabzinyamaliza kuti bzireke kulewa-lewa, thangwe bzikhadziwa kuti iye akhali Krixtu.

⁴²Pomwe kudacena, iye adayenda kudambo. Tsono wanthu akhamunyang'ana ndipo iwo adayenda kukhana iyeko. Iwo akhamungingimira kuti aleke kuwasiya.

⁴³Tsono iye adawauza kuti: “Bzin'funika kuti ndikapalizirembo mizinda inango nkhani yabwino ya Umambo bwa Mulungubu. Nakuti ndidatumidwira bzomwebzo.