Luka 4:29-43

²⁹Se torohai, se abilau ia arinai se heduheduiahalai eanua murimurina eai, abo se woeasaei edi eanua oea tupina eai, ia bena se hedonapiledobei.

³⁰Isi boeadi eai i sapurihai, i lauo ena dobila eai.

³¹I dobima Kaperenauma, Galilaia eanuana esau, asubena sabate gamagamagari i lauheataedi.

³²Ena lauheata wa se noonooei: paana ena riba ma gigiborina.

³³Tau sunago alona eai, earua biibiina ie lui, i eabayaba arinana lailai.

³⁴I ene, “Taiede tabu u laoma arimai eai; oa Iesu Nasareta abo ai sahaim? U laoma bena u unuimai wa? Ea itam’o; oa Eaubada ena Tau Tabuna.”

³⁵Iesu ia i ribasuui, i ene, “U monou me, u lulage murimuri eai.” Diabolo tau wa i heguri boeadi eai, ia abo i lulage murimuri eai, tau wa nige i hebaaea.

³⁶Isi gamagamagaridi se noonoo, se heuheunaboisaha, si ene, “Riba sahasaha ina? Ma gigiborina earua biibiidi i lauhesomdi, abo se lulage murimuri eai.”

³⁷Ia wasana lailai i lau dimo gamagaridi oea wa se tauhetaiiri.

³⁸Sunago i laugabaei, i awasae Simona ena numa alona eai. Simona bosiana i asiebo, i gigibori ariri: enana se aibodalau ia arinai.

³⁹I totoro sine wa gegesina eai, gigibori wa i ribagigiri; abo i lautom; ma esega sine wa i torohai i heaeaiedi.

⁴⁰Na mahana bena i duidobi mo, isi hari iwala gamagaridi se woeaidima ia arinai; ia nimana i toresae gamagaridi potadi eai, i hemauridi.

⁴¹Gamagaridi diabolo se luidi se lulage murimuri eai, se eabayaba, si ene, “Oa Keriso ede, Eaubada Natuna.” Ia i ribagigiridi, i ene tabu se ribaribaei; paana ede se nuatuiyao ia Keriso.

⁴²Mara‐ie‐tom i laugabaedi i lau maratupama eai, tatao ia se eooi, se lage ia arinai, ia se gudugudui, ia nige i laugabaedi.

⁴³I ribalau aridi eai i ene, “Ea lau eanua headi aridi eai hinage, Eaubada ena basileia ribana ea lauguguiaidi: arinai ede se hetamariguma ta.”