ሉቃሴ 4:29-43

²⁹ዬሱሴ ጎቺ ዔኪ ካታማፓ ዙሎ'' ኬሴ''ኔ፤ ዬና ካታሜላ ማዢንቴሢ ዹኬ ዑስካታሢሮ ዒዛ ዔያታ ጎኦቦ'' ሂዒ ዳካኒ ኮዒ ዔኪ ዓኣዼኔ።

³⁰ዒዚ ጋዓንቴ ዔያቶኮ ባኣኪና ቶሊ'' ዴንዴኔ።

³¹ዬካፓ ዬሱሴ ጌሊላ ዓጮ''ይዳ ዓኣ፥ ቂፒርናሆሜ ካታሜሎ ዴንዲ ዒኢካ ዴሮ'' ዓይሁዶ ዓሶኮ ሓውሾ ኬሎ''ና ዔርዛኔ።

³²ዒዚ ቢታንቶና ኬኤዛሢሮ ቢያሢ ዒዛኮ ዔርዚፆና ዲቃቲ ሄርሻኔ።

³³ዒኢካ ዓይሁዶ ዓሶኮ ቡኪንቶ ቤዛ ፑርታ ዓያና ዓርቄ ዓሲ ዓኣኔ፤ ዒዚ ዼኤፒ ዑኡሲና ሂዚ ጌዒ ዒላቴኔ፦

³⁴«ናዚሬቶ ዬሱሴ! ኑኡኮ ኔኤና ዎላ'' ዓይጎ ካኣሚሢ ዓኣይ? ኑና ኔ ባይዛኒ ሙኪያ? ኔ ዖና ማዔቴያ ታ ኔና ዔራኔ፤ ኔኤኒ ዱማዼያ ፆኦሲ ናይኬ!»

³⁵ዬሱሴያ ማሃዖ ፑርቶ ዓያናሢ፦ «ዚቲ ጌዒ፥ ሃያ ዓሢፓ ኬስኬ!» ጌዒ ጎራ''ዛ፥ ፑርቶ ዓያናሢ ዓሢ ዴሮ''ኮ ቤርታ ሎንሤስካፓ ፔቴ''ታዖ ዔኤቢ ዎኦቱዋዖ ኬስኬኔ።

³⁶ቢያሢ ዲቃቲ ሄርሻዖ ዎሊ ኮይላ''፦ «ሃይ ዎዚጉዴ ባኣዚ''ዳይ? ቢታንቶና ሓሣ ዎልቄና ፑርቶ ዓያኖ ዒዚ ዓይሣኔ፤ ዔያታኣ ዒዛም ዓይሢንቲ ኬስካኔ» ጌዔኔ።

³⁷ዬሱሴኮ ሱ'ንፃ ዬኖ ዓጬ''ሎ ኮይሎ''ይዳ ቢያ ዋይዚንቴኔ።

³⁸ዬሱሴ ዓይሁዶ ዓሳ ቡኪንታ ቤዛፓ ዔቂ ሲሞኦኔ ማኣሪ ዓኣዼኔ፤ ዒኢካ ሲሞኦኔኮ ባይሳ ሚርጌና ቆፂንቲ ላሂ ዓኣኔ፤ ዬያሮ ዒዞ ዒ ፓሣንዳጉዲ ዬሱሴ ዔያታ ሺኢቄኔ።

³⁹ዬሱሴያ ዒዞ ባንሢ ዑካዖ ዓጫ ዒዞኮ ዔቂ ቆሣ ሺማንዳጉዲ ዓይሣዛ ቆሣ ዒዞኮ ሺሜም ቤዞማና ዔቂ ዒዛ ዔያቶ ሾኦቺንሥሢ ዓርቄኔ።

⁴⁰ዓባ'' ጌላኣና ዓሳ ዱማ ዱማ ሃርጌና ዓኣ ዓሲ ቢያ ዬሱሴ ባንሢ ዔኪ ሙካዛ፥ ዒዚ ፔቴ'' ፔቴ''ሢኮ ዑፃ ኩጮ ጌሢ ፓሤኔ።

⁴¹ፑርቶ ዓያና''ኣ፦ «ኔኤኒ ፆኦሲ ናኣዚ''ቲ!» ጌዒ ጌዒ ዒላቲ''ና ዓሶይዳፓ ሓሺ'' ኬስካኔ። ዒዚ ሜሲሔ ማዔሢያ ዔያታ ዔሬኔ፤ ዬሱሴ ጋዓንቴ ዒዛ ዛሎ'' ፔቴ''ታዖ ኬኤዙዋጉዲ ዔያቶ ጎሪ'' ላኣጌኔ።

⁴²ሳዓ ካራዛ ዬሱሴ ዒኢካፓ ኬስኪ ዓሲባኣ፥ ዔዌ ቤሲ ዴንዳዛ ዓሳ ዒዛ ዒማ''ና ኮዓኔ፤ ዔያታ ዒዛ ዴንቃዖ፦ «ኑ ኮራፓ ዴንዲፖ» ጌዒ ሺኢቄኔ።

⁴³ዒዚ ጋዓንቴ፦ «ሜሌ'' ካታሞ ታ ዴንዲ ፆኦሲ ካኣቱሞ ኮዦ ሓይሶ ኬኤዛንዳያ ታኣም ኮይሳኔ፤ ታ ዳኪንቴሢ ዬያሮኬ» ጌዔኔ።