Lucas 4:29-43

²⁹Penga niyan, timindeg dan aw impelowà dan sikandin lekat te lonsod dan. Kidoen diatas te bontod se lonsod dan. Yan inibing dan si Jesus doton te pangpang niyan amon idagdag dan sikandin.

³⁰Meneng minokit si Jesus diyà te tengà-tengà te otaw netipon, aw nesayo sikandin.

³¹Nayan, dimoton si Jesus te lonsod te Kapirnaom sakop te probinsya te Galiliya. Pegkesebado, migtoladà sikandin.

³²Ontò nepela se kedita te otaw dimineg te intoladà din, so tinekingan si Jesus te tolos.

³³Kidoen te simbahan te Judiyo, doen otaw dinetengan te bosaw. Timawal sikandin aw dakel se kagi din,

³⁴“Tay, Jesus tege Nasarit. Ikà egsamok kenami. Eked kay keibeg aw pegbàtan kay nikaw. Netegahan ko aw sinu ka. Sikona se metòlid otaw insogò te Timanem.”

³⁵Meneng migsagda si Jesus te bosaw, kagi din, “Kepenek ka. Lowà ka den lekat kandin.” Penga niyan, imbontog te bosaw se otaw sìyan aw limowà lekat kandin, meneng wedà elegi se otaw.

³⁶Nepela se kedita te otaw, aw migpebelaw-belaway dan, “Tay law. Sebad se ipegtoladà din. Ontò sikandin metolos, so aw megpelowà sikandin te menge bosaw, egtolò dan kandin.”

³⁷Penga niyan, ontò nedengeg si Jesus kidoen te kedita te ogpeanan medapag doton.

³⁸Pegkesayo i Jesus lekat te simbahan te Judiyo, dimoton sikandin te balay i Simon iningedanan din ki Pedro. Pegdateng din doton, ontò netigdaan se ogangan i Pedro bayi piglegenaw, aw nemoyò dan te tabang din.

³⁹Penga niyan, dimoton si Jesus kandin, aw migpetunung te keinit te lawa din. Pegketà migkèpiya sikandin, aw minenaw amon meg-inang te kànen i Jesus aw menge doma din.

⁴⁰Pegsallep te aldaw, inibing dan doton ki Jesus se kedita te doma dan doen medita kemolò te mesakit. Pinemàdan din se kedita dan aw negolian dan.

⁴¹Doen heman medita otaw dinetengan te bosaw inibing doton ki Jesus. Peglowà te bosaw, timawal dan, “Sikona se Batà te Timanem.” Meneng sinagda i Jesus te menge bosaw amon eked dan ikagi, so netegahan dan te sikandin se Misiyas insogò te Timanem.

⁴²Pegkeiselem niyan, nesayo si Jesus aw dimoton te wedad otaw eg-ogpà amon megtawal-tawal. Meneng nengemahà se medita otaw kandin. Pegkità dan kandin, ontò dan peden sikandin temengan.

⁴³Meneng minikagi si Jesus, “Keilangan domoton a heman te doma lonsod amon megtoladà a kandan te Mèpiya Indan tepad te peglowan te Timanem, so yan se doun te insogò a din.”