29Orzeꞌ wes su dey, nunu gua nu dey Jesuuz por fers la par ruꞌ gyedz zeꞌ. Gazeꞌ nu pshup dey mi too tub bicy zeꞌ nu ri gyedz zeꞌ, gun bicy pee dey nu nshet lag dey mi gal zeꞌ nu gya ni bicy zeꞌ, gal lo yu la.
30Orzeꞌ bded mi lat dey yam.
31Orzeꞌ Jesuuz yam tub gyedz nu ri lo yu ni Galilea nu la Capernaum. Orzeꞌ sab, dzi nu rzu lagy mbecy Israeel, guꞌm nañ yuꞌ zeꞌ nu rsyaꞌ de mbecy Israeel riidz ni Ñgyoozh par nu lyuum ni dey.
32Orzeꞌ de mbecy za nu la ic dey nu nac coz nu rniim, gun rlyuum ni dey gal nu rlyuu tub mbecy nu riib ic zaꞌ la.
33Na nañ yuꞌ zeꞌ ri tub mbecy nu bicy ni nuras. Orzeꞌ ye la rbish tiy.
34Orzeꞌ nay rab yu Jesuuz: ―Bruu chu. ¿Lagu yad ru lat de̱, Jesuuz, biñ nu bruu Nazaret? ¿A yad ru par nu zaꞌ lor de̱ ya̱? Ya̱ rad lagya̱ nu ru nac ru mbecy yon ni Ñgyoozh ―nay rab yu Jesuuz.
35Orzeꞌ Jesuuz bdzaꞌm ni nuras zeꞌ. Orzeꞌ nam rab mi yu: ―Dzi chel, nunu bruu chu lo yu ii ―nam. Orzeꞌ nuras zeꞌ mneꞌy mbecy zeꞌ lo yu lo rgüii la dela mbecy. Orzeꞌ gazeꞌ nu bruu chuy lo mbecy zeꞌ, nunu se la la bicy yu.
36Orzeꞌ dela mbecy nu yuꞌ zeꞌ gudzib dey. Orzeꞌ na dey rab dey losaꞌy: ―¿Lac yaruu nu nii? ¡Mbecy ii ricy cup yu rishbeey, nunu ricy cup yu mod nu ricy yu mandaar gashtal nuras, nunu orzeꞌ druu chu dey lo mbecy! ―na dey.
37Orzeꞌ lueg la bzu riidz ni de coz nu bicy Jesuuz dela lugaar nu yuꞌ gaab ga.
38Orzeꞌ Jesuuz bruum nañ yuꞌ zeꞌ nu rsyaꞌ de mbecy riidz ni Ñgyoozh. Orzeꞌ yam yuꞌ Simo̱o̱. Zeꞌ ñaa gud Simo̱o̱ riib rat mi. Tonaꞌ la pcaañ zig nim. Orzeꞌ mnishbaa dey lo Jesuuz nu nac mi.
39Orzeꞌ gazeꞌ nu gua Jesuuz bzaab tily mi lom. Orzeꞌ bicy mi mandaar nu gruu zig zeꞌ. Orzeꞌ bruu zig mi. Gazeꞌ nu lueg la weshtem, nunu brugyiꞌ rzu bich mi nu nac dey.
40Na ornu bi za doo na, orzeꞌ dela mbecy nu ricy cup famil ni nu rat zañ lo güii, orzeꞌ gua nu dey yu lo Jesuuz. Orzeꞌ mi zeꞌ briib yaam too tub ga la dey. Gazeꞌ nu byac dey.
41Nunu bruu chu zañ nuras nu bicy ni mbecy nu yuꞌ lat de mbecy rat zeꞌ. Orzeꞌ nuras zeꞌ rbish ti dey. Orzeꞌ na dey rab yu Jesuuz: ―¡Ru nac ru iꞌñ Ñgyoozh! ―na dey. Orzeꞌ Jesuuz bdzaꞌm ni de nuras zeꞌ. Orzeꞌ wansaan mi nu nii zir dey, gun yuꞌ lo dey mi nu nac mi Mesías, biñ nu ca lo cuen nu cyid.
42Na or bzaꞌ yu tuubaꞌ dzi na, orzeꞌ Jesuuz bruum lat gyedz zam tub lugaar ub zi. Orzeꞌ de mbecy brugyiꞌ nu ryub dey mi. Orzeꞌ bruꞌña dey zeꞌ nu zum. Orzeꞌ bicy pee dey nu wazaan yu nu gruum lat dey.
43Orzeꞌ nam rab mi dey: ―Tees niꞌ ziꞌl rlagy ñi cha shaala̱ de riidz nap ni gyel gubier ni Ñgyoozh de reñaꞌ gyedz, gun par ndeꞌ bzuu nez Ñgyoozh ya̱ ―nam.
San Lucas 4
San Lucas 4:29-43