Luuk 4:29-43

²⁹Uuduuduu kolooŋ oŋono waama Jiisas konjoma otaagi taoŋ seleeŋgeŋ keno. Taoŋgia ii baaŋaa sia kosianoŋ megi nanoti, mono iikanoŋ hagogi kemebaatiwaajoŋ keŋgi.

³⁰Keŋgito, batugianoŋ qendeema oŋomesaoŋ keno. Kiaŋ.

³¹Jiisasnoŋ Galili prowins uutanoŋ Kaperneam taonoŋ kamaaŋ keuma Sabat kendonoŋ ejemba tuuŋ kuma oŋono.

³²Kuma oŋono qaayanoŋ ku-usuŋawo kolooro jero. Kawaajoŋ kanageso yoŋonoŋ ii iima aaruŋ waliŋgogi.

³³Qamakooli miri iikanoŋ eja moŋ omeyawo raro. Raro omeyanoŋ tereŋgoŋ silama qa kokaeŋ qaro,

³⁴“Ae! Jiisas, Nazaret eja! Gii nomaeŋ ama nonomambaajoŋ anjaŋe? Mono tiwilaaŋ nonomambaajoŋ kajaŋ me? Nii kaniaga moma kotojeŋ. Gii Anutuwaanoŋ eja Tak-kootoya koloojaŋ.”

³⁵Kaeŋ qaro Jiisasnoŋ temboma kokaeŋ jeŋ muro, “Gii mono qaaga bogoro eja koi mesaoŋ togowa.” Kaeŋ jeŋ muro omenoŋ eja ii meŋ giliro tama batugianoŋ namonoŋ kemero qeŋ mizimizi mende totooŋ kolooŋ kouma mesaoŋ keno.

³⁶Keno kuuyanoŋ newogia tegoro waliŋgoŋ batugianoŋ amiŋ moma kokaeŋ jegi, “Yei! Qaa koi naa qaaga? Iinoŋ mono esuŋmumu qaganoŋ ome jeŋ kotoŋ oŋono teŋ koma kouma kenju.”

³⁷Kaeŋ kolooro Jiisaswaa qabuŋayanoŋ seiŋ gomaŋ kuuya kosere rama keŋgiti, iikanoŋ kema sokono. Kiaŋ.

³⁸Jiisasnoŋ waama Kaperneam qamakooli miri ii mesaoŋ Saimon Piitowaa mirinoŋ uro. Uro Saimombaa seuŋanoŋ selegere ji uuta kiro ero. Ero iwaajoŋ ama Jiisas qama kooliŋ mugi.

³⁹Qama kooliŋ mugi kema usugoŋ kemeŋ selegere jeŋ kotoŋ muro mesaoro iikanondeeŋ waama nene ooŋ uŋuagiro.

⁴⁰Weeŋ jaaya tegoŋ kemero kanoŋ ejemba daeŋ yoŋonoŋ alaurugia ji kania kania kanoŋ iŋiro egiti, ii kuuya uŋuama Jiisaswaanoŋ kagi. Kagi boria kuuya yoŋoo qagianoŋ aŋa aŋa ano qeaŋgodaborogi.

⁴¹Ome yoŋonoŋ kaaŋagadeeŋ ejemba mamaga yoŋoo uugianoŋga kouma silama kokaeŋ qagi, “Gii Anutuwaa meria koloojaŋ.” Jiisasnoŋ Hamoqeqe Toya Kraist kolooji, iyoŋonoŋ ii mogitiwaajoŋ Jiisasnoŋ jeŋ oŋoma buugia muuŋguŋ oŋotaaro. Kiaŋ.

⁴²Jiisasnoŋ gaoŋ ero gomaŋ weŋgeraŋ suluro waama iyaŋa tiriŋ kotoŋ kemeŋ goria moŋnoŋ keno. Kenoto, ejemba yoŋonoŋ iwaaŋ muŋ kema mokolooŋ mende oŋomesaoŋ kembaatiwaajoŋ batogoŋ aŋgoŋ koma mugi.

⁴³Aŋgoŋ koma mugito, kokaeŋ iŋijoro, “Niinoŋ Anutu bentotoŋaa Oligaa Buŋa ii taoŋ tosia yoŋoojoŋ kaaŋagadeeŋ jeŋ asariŋ oŋombe sokombaa. Anutunoŋ mono iikawaajoŋ wasiŋ nono.”