San Lucas 4:29-43

²⁹Katmizna uspane kuhsak kit ussa pɨpulukis pianamal tɨnta ɨninñara, pilchirarakima. Uspane Jesústa kwash pilchiramans kiakpɨnashira, inapa.

³⁰Uspa ussa pilchiramans kiakpɨntachi akwa, usne uspa paizkakis puz kit ɨrɨt.

³¹Suasne Jesúsne Capernaum pɨpulura, Galilea sura, kihsh kit ɨt kit kwaizkulmu payura usparuzpa kammu yalta kamtanamɨzta.

³²Katsa mikwakana kamtanara akwa, wan awane Jesúspa kamtampa iztaspaarɨt.

³³Maza ampune kammu yalta tuara. Salizne ussa piz kit ussa tɨnta ka kaizninta:

³⁴—Nune Jesús i. Nazaret pɨpuluras i. ¿Aumɨza naizninnamas? Nane nuwa pianish. Nune Diostas sɨnammika i, kizta.

³⁵Jesúsne ussa kaizta: —Sunkana kaizmun. Puñain. Ampuras puzti, kizta. Sun mɨrawane, salizne ussa awa paizkakin piltain nainninta. Suasne ampuras ɨrɨt, ampura kwail kitchin.

³⁶Wan awane iztaspaat kit usparuzpain kaizara: —Jesúsne tɨnta paramtu. Us tɨnta akwa, usne salizta kaiz kit puzninta. Salizta ɨnintawane, ampuras puzninta, kizara.

³⁷Sun suwarane akkwan awane Jesús kit aizpa piankamara.

³⁸Suasne Jesús kammu yaltas puztawane, Simón Pedrowa yalta napta. Suane Pedrowa suegra ishtu tuazi, imukasa. Uspane ussa paikuara, ussa wat paninnapa.

³⁹Jesúsne ussa ɨt kit iz kit imu kaninta. Sun urain wat parɨt. Usne kuhsak kit kumira sat kit usparuza kwinnara.

⁴⁰Sun payu pãn payaptɨkane, awane akkwan tuntu ishturuza Jesústa karaara. Usne usparuza paanat kit wanta wat paninnara.

⁴¹Jesúskas mɨnpazha saliztuza puzninnara. Puzarawane, salizne ka kwianara: —Nune Dios painkul i, kizara. Uspa Jesúspa pian akwa, Jesúsne usparuza paraninnarachi. Uspane Jesúsne Dios painkulpa azi pianmara.

⁴²Kɨntɨkane, Jesúsne pɨpulukis ɨt kit pul sura, awa tuchira, ɨrɨt. Awane ussa sayara. Ussa sayarawane, ustukin wanmalara. Uspane ussa “Akkis ɨmun” kaizara.

⁴³Jesúsne usparuza kaiznara: —Dios watsal pit mamaz pɨpulukin uztuza kainanashimtus. Diosne awara ɨninnashimtu. Katmizna sun akwa Diosne nawa ɨninta.