Luka 4:29-43

²⁹Thaj uštile thaj tradije le avral taro foro, thaj inđarde le ko brego najuče kaj sasa čerdo lengo foro te čhuden le odupral natele.

³⁰A o Isus nakhlo maškar lende, thaj đelo pire dromesa.

³¹Pale gova, o Isus ulilo ano Kafarnaum ano foro Galilejsko, thaj sikada ko đive e savatoso.

³²Thaj čudisajle lese sikaimasa, golese kaj leso vačaripe sasa zuralo.

³³Gothe ani sinagoga sasa manuš ane kaste sasa melalo dux e demoneso, thaj dija vika:

³⁴“So manđe amendar, Isuse taro Nazaret? Aviljan li te mudare amen? Đanav ko san tu: Sveco e Devleso!”

³⁵Thaj o Isus dija vika pe leste: “Phande ćo muj, thaj iklji lestar!” Thaj perada o demono e manuše angle sa e manuša, thaj o demono iklilo lestar, thaj khanči ni čerda lese bilačhe.

³⁶Thaj ane savorende avili i dar thaj čudisajle, thaj jekh averese vačarde: “Save si kala lafura! Ano autoritet thaj ano zuralipe vačarol e melale duxurenđe te ikljon, thaj von ikljen!”

³⁷Thaj đelo o lafi lestar ane sa e pašutne thana.

³⁸O Isus uštilo gothar andari sinagoga thaj avilo ano čher e Simonese, a e Simonese sasuja sasa la bari groznica, thaj rodije lestar te vazdol la.

³⁹Thaj o Isus ačhilo paše late, pretisada e groznicaće, thaj mukhlja la. Sigate uštili thaj kandija len.

⁴⁰Thaj kana pelo o kham, savoren save sesa len nasvale tare sa đi jekh nasvalipe andelen angle leste, a vov pe savorende čhuta pe vasta, thaj sastarda len.

⁴¹Thaj e benga iklile tare pherdo thaj dije vika thaj vačarena: “Tu san o Čhavo e Devleso!” Thaj darada len te ma vačaren khanikase golese kaj đanglje kaj si vov o Hrist.

⁴²Thaj kana iklilo o đive, iklilo thaj đelo ani pustinja, thaj e manuša rodije le, thaj avile leste, thaj manglje te ačhaven le te ma đal lendar.

⁴³A o Isus vačarda lenđe: “Trubul ane avera forora te vačarav o Lačho lafi taro carstvo e Devleso, golese sem bičhaldo.”