Lucas 4:29-43

²⁹Jẽgjẽg nẽgnẽ ag tóg mũ sir. Kãpa ag tóg mũ sir. Ti vóg ag tóg mũ sir, pãnónh ra. Nazaré vỹ pãnónh tá nĩ, ag jamã ti. Pãnónh ẽn to jãpry kỹ ag tóg tá ti kutẽm sór mũ, kãgnó ki ti ter jé.

³⁰Hã ra Jesus tóg ag ré kỹ tĩ mũ, ag jãmĩ. Ti tỹ hẽ ri ke tũ ag tóg nĩ sir, kỹ tóg ag fĩn rãm kỹ ag ré kỹ tĩ mũ. Hã ra ag tóg ti vĩ kri fi jãvãnh nỹtĩ, ti jamã tá ke ag.

³¹Kỹ Jesus tóg cidade tỹ Cafarnaum ra tĩ mũ. Ga tỹ Galiléia tá ti nĩ, Cafarnaum ti. Tá jun kỹ tóg ag kanhrãn mũ, vẽnh kán ke kurã ki.

³²Kỹ tóg ag mỹ e tĩ, ag tỹ ti vĩ mẽn kỹ. Ti vĩ vỹ vẽnh kar vĩ kãfór nĩ, hã kỹ tóg ag mỹ e tĩ.

³³Kỹ vẽnh kanhrãn jafã ẽn krẽm ũ tóg nĩ nĩ. Jagrẽ kórég ti nĩ. Kỹ tóg prẽr mũ, kỹ tóg:

³⁴“ha mẽ, ã tỹ ẽg tỹ hẽ ri kenh ke nẽ, Nazaré tá Jesus'?” he mũ. “Ã mỹ ẽg tũg sór mũ'?” he tóg. “Ã ki kanhró sóg nĩ. Tỹ ã tóg ã pir mỹ Topẽ mré ke nĩ, ti tũ pẽ vỹ tỹ ã nĩ,” he tóg, ũn jagrẽ kórég ti.

³⁵Hã ra Jesus tóg ti mỹ vĩ tar han mũ, kỹ tóg: “vĩ tũg ra,” he mũ. “Ti tovãnh ra,” he tóg. Kỹ ti jagrẽ kórég ẽn tóg ti ter tĩ han mũ, vẽnh kar rĩnve, kỹ tóg ti ki kutẽ mũ sir. Ti kókég tũ tóg nĩ, ti jagrẽ kórég ti.

³⁶Kỹ tóg vẽnh kar mỹ e pẽ tãvĩ tĩ sir. Jagnẽ mỹ ag tóg: “ne nẽ hỹn vé'?” he mũ. “Vẽnh jagrẽ kórég ag mỹ tóg vĩ tĩ, Jesus ti, kỹ ag tóg sir ki króm tĩ, ti vĩ ki, ti kamẽg kỹ, ti tỹ ag pan kỹ. Ti hỹn tỹ ag kri ke nĩ,” he ag tóg mũ sir, Jesus to.

³⁷Kỹ ti kãme tóg vẽnh kar kri rũm ke kãn mũ sir, ga ẽn tá.

³⁸Kỹ Jesus tóg vẽnh kanhrãn jafã ẽn ki kutẽ kỹ Simão ĩn ra tĩ mũ. Hã ra Simão prũ fi mỹnh fi tóg kaga nỹ nĩ. Rỹ jagy fi nỹ nĩ. Kỹ ag tóg Jesus mỹ fi tó mũ.

³⁹Kỹ tóg fi vẽnh tĩ mũ. Fi krĩ tá jẽ kỹ tóg fi mỹ: “rỹg mãn tũg nĩ,” he mũ. Kỹ fi rỹ ẽn tóg tũ' he mũ sir. Kỹ fi tóg vẽsỹmér nĩ nĩ. Ag ki rĩr fi tóg mũ sir, Simão má fi.

⁴⁰Kỹ tóg sir kutyg mũ, rã tỹ pun ke kỹ. Kỹ ag tóg ũn kagyga ag tatĩn kãmũ kãn mũ. Kỹ tóg ã nĩgé tỹ ag mẽ kãn mũ, Jesus ti, kỹ ag tóg hághá' he kãn mũ.

⁴¹Vẽnh jagrẽ kórég pan kãn tóg mũ gé, ag to jũ kỹ. Ag panh ke to hã ag tóg prẽr mũ, kỹ ag tóg: “Topẽ kósin vỹ tỹ ã nĩ,” he tĩ. Hã ra tóg ag mỹ: “vĩ tũg ra,” he mũ. Ti ki kanhró ag tóg nỹtĩ, ti tỹ tỹ Cristo nĩ ti. Hã kỹ tóg ag mỹ: “vĩ tũg ra,” he mũ, Jesus ti.

⁴²Tỹ vaj kỹ Jesus tóg tá kutẽ kỹ ẽmã tũg ja ra tĩ mũ. Kỹ vẽnh kar ag tóg ti jãvãnh kãn mũ. Hã ra ag tóg ti vég mũ. Ti ve kỹ ag tóg ti mỹ: “ẽg ré kỹ tĩ tũg nĩ,” he mũ.

⁴³Hã ra tóg ag mỹ: “vó,” he mũ. “Cidade ũ ra sóg tĩg mũ, sỹ ag mỹ Topẽ vĩ tó jé gé, Topẽ tỹ tỹ ẽg pã'i nĩnh ke ti. Hã jé Topẽ tóg inh mỹ: “ha ag mỹ vẽnh ven,” he ja nĩ,” he tóg ag mỹ, Jesus ti.