Lukas 4:29-43

²⁹Honona raprir pia rhokar doinia Yesus la'a leta to'orni, pa ra rpuitia la'a tuini werna ida, maka ha rariria letni de. La ralma-riorni totpena rotliernia Yesus la'a tuini werna kdieldelam de ralamni.

³⁰Mere Yesus Nala'a la riy mutlialawna re letgarni pa nadil doin la (Nla'awa).

³¹Nhor nioma Yesus Nla'awa la leta Kapernaum la Galilea. La hande de Enwatutga riy rahu la'a Sabat lerni, maka Yahudi edon rkar lia de.

³²Riy rwer rer wiawni la wniatutnu-wniaye'eni de, yoma Nodi plolli (wibawa) pa Nwatutu.

³³La'a gen miaka nhi'inde Yahudi rhi' kreini-iskolli la, de riy ida maka hegana nhu'ru ralma. Nhaunu-nhaunu pa niwra:

³⁴“Hoi, Yesus Nasartu ne! Hota Omhi' nan emkameni mai ami oo! Ommuai pia mpieyat ami? A'g e gat niohora de he' O'a! O' di de maran yamou-wuhur yatoha (yang suci) maka Uplerlawna Nwalir niana pa Nhopan pa Ommuai lia nohkerna wawannu!”

³⁵Dewade Yesus Nkamota Niwra: “Rhodal nurmu! Rhokargo'tu la'a riy di!” Noma yatni-rha'ani de nhi' riy de pa ntuini la tani wawannu la'a riy honona gaini ralamni, nhor nia'nama yatni-rha'ani de nhargot wa, mere riy de edonna na'eram nana mehra-mau kuku' eti.

³⁶Riy honona rwer rer wiawni me idma nakot la ida riwra: “Ha yaltierni de Nodi plolli la hegana-kawnu, yatni-rha'ani pa ema rho'or dodioinia!”

³⁷La' hade pede yeher to'ama Yesus kotni-nanni ema reyapie'era la geni-tiena re honona mak rehgorgoru.

³⁸La'pa Yesus Nhoitio'or la gen miaka Yahudi re rhi' kreini-iskolli de, noma Nodi liarni la Simon romni. La' de Simon yananni entepartarlia riuru npahna nohora tema pniahnani, noma rwaka Yesus pa Ntulan la.

³⁹Pede Yesus Nla Nwakriania patke' de yanin genni, na'nama Nkamota ruru pniahna della' patke' de, dewade nnienni de nmolu. Noma namat meman pa nla nwahi'a-nwayodia ya'ana-yemnu pa honona ra'ana-remnia.

⁴⁰La'pa lera ntuinia dewade riy rahu rodia inni-narni honona maka kler la nnieni-nhiena mehra-mau pa rma rahaka Yesus. La' pa Yesus Nran limni la mak kanieni re riy nenenna wawannu, dewade honona re nnienni rkalwied wa.

⁴¹Yatni-rha'ani, hegana-kawnu re mana rlergot momuou lia riy harahu me yatni-rha'ani polpuolu-hawaunia riwra: “Amatg oleka de Uplerlawna A'nani O' ee!” Mere Yesus Nkamota re totpena yana rakot nohor E'a, yoma hegana-kawnu re rat niohora de Ray Makamori-Kalewna maka Uplerlawna Nano'targa E inhatta.

⁴²La'pa lera matni nra'pa gota dewade Yesus Nhoitio'ora la let de wa, ne Nokria geni hgali ida. Riy rahu rtepartarlia yahakni, pa la'pa rlernana de honona rwak memna E'a totpena yana Nwarei lia ir onni.

⁴³Mere Yesus Nakot la Niwra: “Kot Kalwieda-Paitiota maka rakot nohora emkameni la Uplerlawna Nodi plolli la riy pa emeka ir Rayni, de hota A'ukot nohora la miy edonna mieh'a mere A'ukot nohor walia la leta-leta korni dom to' wali. Yoma la hade pede Uplerlawna ed mak khopan pa Amuai lia nohkeran di wawannu!”