Luka 4:29-43

²⁹I uštindoj ispudinde le tari diz, i legarde le upre ko brego upro savo lengiri diz inele vazdime te šaj frden le odupral.

³⁰Ali o Isus nakhino maškar olende i dželo.

³¹I o Isus huljilo ani e galilejakiri diz Kafarnaum, i sikavđa e manušen ko dive e savatesoro.

³²I on inele zadivime lesere sikavibnaja adalese so lesoro vaćeriba inele ano autoritet.

³³A adari, ani sinagoga, inele manuš opsednutime e demonesere melale duhoja hem oto sa o glaso vičinđa:

³⁴“Oh, so mangeja amendar, Isuse Nazarećanine? Aljan li te uništine amen? Džanav ko tu injan: o Sveco e Devlesoro.”

³⁵Tegani o Isus ukorinđa le: “Phand to muj hem ikljov olestar!” I o demoni frdinđa le ki phuv maškaro manuša, iklilo olestar hem ni xari na dukhavđa le.

³⁶I sare začudinde pe hem vaćerde jekh avereja ađahar: “Savo li vaćeriba adava da ano autoritet hem ano zoralipe naredini e melale duhovenđe te ikljon i onda ikljona?”

³⁷I o glaso e Isusestar dželo ko sa o pašutne thana.

³⁸O Isus iklilo tari sinagoga hem dželo ko čher e Simonesoro. E Simonesere sasuja inele bari jag. I on zamolinde le te sasljari la.

³⁹I o Isus terdino uzalo late, naredinđa e jagaće i oj muklja la. I odmah uštini hem lelja te kandel len.

⁴⁰Ked o kham huljilo, sarijen kolen inele namborme manuša oto razna nambormipa, ande len koro Isus. A ov upra đijekheste olendar čhivđa ple vasta i sasljarđa len.

⁴¹A butendar da iklile o demonja vičindoj hem vaćerindoj: “Tu injan o Čhavo e Devlesoro!” O Isus pretinđa len hem na muklja len te vaćeren adalese so džande dai ov o Hrist.

⁴²Ked dislilo, o Isus iklilo tari diz hem dželo ko jekh čučo than. I pherdo džene rodinde le. Ale đi leste hem na mukena le ine te džalfse olendar.

⁴³A ov phenđa lenđe: “I ko avera dizja valjani te vaćerav o šukar lafi oto carstvo e Devlesoro adalese so adalese injum bičhaldo.”