33Sar avle pre oda than, so pes vičinel Lebka, ode les ukrižinde a leha the ole živaňen – jekhes pal e čači (pravo) a dujtones pal e baľogňi (ľavo) sera.
34O Ježiš phenďa: “Dado, odmuk lenge, bo na džanen, so keren!” Paľis peske rozulade leskere gada a losinde vaše.
35O manuša ačhenas a dikhenas. O Židovike vodci lestar asanas a phenenas: “Avren zachraňinelas! Mi zachraňinel pes korkoro, te ov hin o Mesijašis, oda avrikidlo le Devleskero!”
36The o slugaďa lestar asanas, avenas a podenas leske šut.
37Phenenas: “Te sal tu oda Židoviko kraľis, zachraňin tut!”
38Upral leste sas pisimen: “Kada hin le Židengero Kraľis!”
39Jekh olendar, savo leha sas ukrižimen, vakerelas pre leste: “Či na sal tu o Kristus? Zachraňin pes the amen!”
40Ale oka dujto leske zoraha priphenďa: “Aňi tu na daras le Devlestar? Se the tu sal avke odsudzimen!
41Amen čačipnaha chudľam oda, so peske zasogaľinďam (zaslužinďam), ale ov na kerďa ňič nalačho!”
42A phenďa: “Ježiš, leper tuke pre ma, sar aveha andre tiro kraľišagos.”
43O Ježiš leske phenďa: “Čačipen tuke phenav, adadžives aveha manca andro rajos.”
44Sas vaj dešuduj (12) ori pro dilos a avľa o kaľipen pre caľi phuv a ľikerelas dži trin ori.
45O kham kaľiľa a o chramoskero pochtan phariľa pro jepaš.
46O Ježiš vriskinďa zorale hangoha: “Dado, andre tire vasta dav mire duchos!” Sar oda phenďa, muľa.
47Sar dikhľa o veľiťeľis upral o šel slugaďa, so pes ačhiľa, lašarelas le Devles a phenďa: “Kada manuš sas čačes čačipnaskero!”
48Savore nipi pes ode zgele sar pro ďivadlos, hoj te dikhen, so pes ode ačhel. Sar oda dikhle, marenas pes andre brekh (andro čuča) a gele het.
49Savore, save prindžarenas le Ježiš, ačhenas dural. A dikhenas pre oda the o džuvľa, save pal leste džanas andral e Galileja.
LUKAŠ 23
LUKAŠ 23:33-49