San Lucas 23:33-49

³³Nijkuak oajsitoj itech nekáj lugar kan kitokayotiaj Mikkatzontekomatl, ompa okimajmasoltijkej itech krus in Jesús, iwan noijki okinmajmasoltijkej omen tlakaj katlej mach kualtin: se ik iyekma in Jesús iwan oksé ik iopochma.

³⁴Nijkuak in Jesús okimajmasoltijkej itech krus, okijtoj: ―Papan, xikintlapojpolwi, porke mach kimatij tlan kichiwaj. In soldadojtin omotlankej para kitaskej kenik kimoxejxeliliskej entre yejwan itzotzol in Jesús.

³⁵Miekej tlakaj ompa otlachixtokaj. In tekiwajkej sa tekitl okiwetzkiliayaj in Jesús, okijtoayaj: ―Okinmakixtij oksekimej. Axan Yej inewian ma momakixti, tla melawak yen Cristo katlej Dios okipejpenke.

³⁶In soldadojtin noijki okiwetzkiliayaj in Jesús, omijkuanijkej inawak iwan okimakakej ma koni iayo uvas xokok,

³⁷iwan okilwiayaj: ―Tla tej tiRey de judiojtin, ximomakixti tej monewian.

³⁸Iwan ikuapak okipiaya se letrero ijkuilitok ika tlajtole griego, latín iwan hebreo, okijtoaya: “YIN YEN REY DE JUDIOJTIN.”

³⁹Se de yen omen tlakaj katlej mach kualtin katlej ompa opilkatoka itech krus, noijki san tlan amo okilwij, okijtoj: ―Tla tej tiCristo, monewian ximomakixti, iwan xitechmakixti in tejwan noijki.

⁴⁰Pero in oksé katlej noijki mach kuale, okajwak iwan okilwij: ―¿Amo tikimakasi in Dios, maski ya tikmati nik san sekan timikiskej?

⁴¹Tejwan technamiki ma techtlajyowiltikan, porke ya tiktlaxtlajtokej tlan otikchijkej, pero yin tlakatl mach itlaj okichij.

⁴²Iwan okilwij in Jesús: ―Jesús, xinechelnamiki itech nekáj tonale nijkuak oksemi tiwalmuikas para titlanawatis.

⁴³Jesús okinankilij: ―Ipan melajka nimitzilwia, axan tias nowan itech paraíso.

⁴⁴Nijkuak oajsik kej tlajko tonale, otlatleyuak itech nochi in tlaltikpak iwan owejkaj asta las tres de tiotlakke.

⁴⁵In tonale mach ok otlawij, iwan kortina de yen weyi tiopan otlajkotzayanke.

⁴⁶Ijkuakón Jesús otzajtzik chikawak: ―Papan, ipan momatzin niktlalia noanima. Nijkuak otlanke ijkón okijtoj, omikke.

⁴⁷Nijkuak in kapitan romano okitak tlan otlamochij, okiweyikixtij in toTajtzin Dios, okijtoj: ―Yin tlakatl melawak nik oyeka kuale tlakatl.

⁴⁸Nochtin in tlakaj katlej ompa oyekaj iwan okitakej nochi tlan otlamochij, omokuepkej moyolkokojtiwej iwan moelpantlatzinijtiwej.

⁴⁹Pero nochtin katlej inwan omixmatia in Jesús, iwan siwamej katlej owalajkej iwan Jesús desde estado de Galilea, san wejka omokajkej konitokej nochi yon tlamantle.