San Lucas 23:33-49

³³Catiꞌ guladxinëꞌ latj nazíꞌ lei Calavera, le rna lu didzaꞌ xidzaꞌ: “Latj Qui Bögaꞌ Icjruꞌ”, niꞌ guludë́ꞌë Jesús lëꞌi yag cruz. Guludë́ꞌë caꞌ lë́ꞌigac yag cruz chopëꞌ bönniꞌ tuaꞌdöꞌ naꞌ. Tuëꞌ guludë́ꞌë cuit lëꞌë yubél Jesús, len yetúëꞌ guludë́ꞌë cuit lëꞌë yögl.

³⁴Niꞌr Jesús rnëꞌ: ―Xuz, bnit lau lequëꞌ, le cutu nözcnëꞌ bi tunëꞌ. Gululë́ꞌë qui queëquëꞌ le nacuëꞌ Jesús bönniꞌ rjaquëꞌ gdil‑l nacuꞌë niꞌ, len guluquitjëꞌ le gac bëꞌ lahui.

³⁵Gulutitjëꞌ Jesús bunách nacuáꞌ niꞌ tuꞌyú len bönniꞌ dë lu naꞌquëꞌ, taꞌnë́ꞌ: ―Yuguꞌ nu yubl buslë́ꞌ bönniꞌ ni. Naꞌa ral‑laꞌ uslá cuinëꞌ chquiꞌ naquëꞌ Cristo, bönniꞌ gröczëꞌ Dios.

³⁶Gulutitjëꞌ caꞌ Jesús bönniꞌ naꞌ rjaquëꞌ gdil‑l. Gulabiguëꞌë ga naꞌ zoëꞌ len guluguiꞌjëꞌ Lëꞌ nup zi,

³⁷taꞌnë́ꞌ: ―Chquiꞌ nacuꞌ Liꞌ bönniꞌ gna béꞌinëꞌ bunách judío, buslá cuinuꞌ.

³⁸Daꞌ caꞌ lëꞌi yag cruz icjlëꞌ Jesús tu le nayúj lu guich lu didzaꞌ griego len lu didzaꞌ latín len lu didzaꞌ hebreo, le rna cni: “Bönniꞌ Rna Béꞌinëꞌ Bunách Judío.”

³⁹Tuëꞌ bönniꞌ huiaꞌdöꞌ naꞌ dëꞌë lëꞌi yag cruz bulídz ziꞌë Jesús, rnëꞌ: ―Chquiꞌ nacuꞌ Liꞌ Cristo, buslá cuinuꞌ lencaꞌ netuꞌ.

⁴⁰Bubiꞌë didzaꞌ yetúëꞌ bönniꞌ huiaꞌdöꞌ naꞌ, gdil‑lëꞌ lzëꞌë naꞌ, rnëꞌ: ―¿Naruꞌ cu rádxinuꞌ‑nëꞌ Dios? Lëzcaꞌ liꞌ narugu quiuꞌ gatiuꞌ.

⁴¹Le nactë rëꞌu, le ral‑laꞌz gac queëruꞌ rzacaꞌ rguiꞌruꞌ, ca naꞌ rajlö́z döꞌ biaꞌruꞌ, san Bönniꞌ ni, cutu bi döꞌ nuꞌë.

⁴²Niꞌr bönniꞌ ni rëꞌ Jesús: ―Yajnéy nedaꞌ catiꞌ gdxinuꞌ ga niꞌ gna bëꞌu.

⁴³Jesús rëꞌ lëꞌ: ―Le nactë rëpaꞌ liꞌ, naꞌa dza ni sóalenuꞌ nedaꞌ latj lach quiaꞌ.

⁴⁴Catiꞌ bdxin gdu huagbídz, bchul gdutë yödzlyú ga bdxinr gdu rdöd xhuö.

⁴⁵Bchul gbidz, atiꞌ lariꞌ nal‑laꞌ lu gdauꞌ brözaꞌ chop diꞌil.

⁴⁶Niꞌr bëꞌë zidzj didzaꞌ Jesús, rnëꞌ: ―Xuz, rguꞌa lu naꞌu böꞌ nacczaꞌ. Catiꞌ budx gnëꞌ cni, brujtë böꞌ nacczëꞌ, gutiëꞌ.

⁴⁷Catiꞌ bléꞌinëꞌ ca naꞌ guc bönniꞌ nacuꞌë lu nëꞌë bönniꞌ rjaquëꞌ gdil‑l, gluꞌë Dios yöl‑laꞌ ba, rnëꞌ: ―Le nactë bönniꞌ ni guquëꞌ bönniꞌ tsahuiꞌ.

⁴⁸Catiꞌ gulaléꞌinëꞌ lë naꞌ guc yúguꞌtë bönniꞌ nacuꞌë niꞌ tuꞌyúëꞌ, yhuöjquëꞌ yödz, taꞌgapaꞌ lchuꞌquëꞌ le tuꞌbannëꞌ.

⁴⁹Ziꞌtuꞌz gulugáꞌn yúguꞌtë nup niꞌ núnbëꞌgac Jesús len ngul naꞌ yjáclennu Lëꞌ catiꞌ niꞌ gzoëꞌ luyú Galilea, tuꞌyúëꞌ lë ni rac.