SAN LUCAS 23:33-49

³³Bra nu mdiya neꞌ seꞌen naan La Calavera (kiꞌya seꞌen nskwa tijyan ke jyoꞌo), bra kanꞌ mjiꞌin kaꞌan neꞌ ꞌin Jesús lo wsi la kanꞌ. Kwiꞌ ngwañaꞌan, mjiꞌin kaꞌan neꞌ ꞌin taꞌa tyukwaa nten nu mdiꞌin kiꞌya tnun ꞌin; mjiꞌin kaꞌan neꞌ ꞌin ska yu kuxi kanꞌ lo xka yka wsi nu nduun laꞌa seꞌen kwin seꞌen ngaꞌan Jesús, bra kanꞌ mjiꞌin kaꞌan neꞌ ꞌin xka yu kuxi kanꞌ lo xka yka wsi nu nduun laꞌa seꞌen kaa.

³⁴Xa nu ti ndiꞌin sndaru nu mjiꞌin kaꞌan ꞌin neꞌ lo wsi, bra kanꞌ ykwiꞌ Jesús loꞌo Ndiose Sti yu: ―Stiǐn ―ndukwin yu―, kuꞌnii chaꞌ tlyu tiꞌ ꞌin neꞌ re, ja jlyo ꞌa tiꞌ neꞌ ni chaꞌ lka ngiꞌni neꞌ ngwañaꞌan. Bra kanꞌ ngutsaa sndaru kanꞌ steꞌ Jesús xa nu ndiꞌin jya ti neꞌ loꞌo taꞌa neꞌ.

³⁵Loꞌo mdiꞌin ꞌa nten nu ñaꞌan kwiꞌya ꞌin Jesús. Loꞌo neꞌ wsiya mstyi lyoꞌo neꞌ ꞌin Jesús bra kanꞌ. Nde ñaꞌan ykwiꞌ neꞌ loꞌo taꞌa neꞌ: ―Ngulaa yu ꞌin xka la nten nu ngwa xkanꞌ; loꞌo ni, ndiꞌin chaꞌ kulaa yu ꞌin yu, ti ykwiꞌ ti yu, si chañi chaꞌ lka yu Krixtu nu ngulo suwi Ndiose ꞌin ndijyan lo chalyuu re ―ndukwin neꞌ kanꞌ.

³⁶Loꞌo sndaru kanꞌ, mstyi lyoꞌo neꞌ ꞌin yu ndijyan neꞌ kwiꞌ seꞌen nduun wsi, mda neꞌ mñun tiyeꞌ chaꞌ koꞌo yu.

³⁷Bra kanꞌ ykwiꞌ neꞌ kanꞌ loꞌo yu: ―Kulaa ꞌiin ti ykwiiꞌ ti, si chañi lkaa Ree ꞌin neꞌ judío ―ndukwin sndaru kanꞌ ꞌin Jesús.

³⁸Wa ngaꞌan letra ke wsi seꞌen ngaꞌan Jesús nu nchkwiꞌ: “Yu re lka yu Ree nu lka ndloo la ꞌin neꞌ judío.” Snan lo chaꞌ nu nchkwiꞌ nten ngaꞌan chaꞌ kanꞌ: chaꞌ griego ngaꞌan, loꞌo chaꞌ latín ngaꞌan, loꞌo chaꞌ nu nchkwiꞌ neꞌ judío ngaꞌan.

³⁹Bra kanꞌ chen ñaꞌan ykwiꞌ ska yu kunan taꞌa ngaꞌan Jesús lo wsi kanꞌ: ―Si chañi chaꞌ Krixtu lkaa, kulaa ꞌiin ti ykwiiꞌ ti sikwa; loꞌo ꞌware, kulaa ꞌwa ―ndukwin yu ꞌin Jesús.

⁴⁰Bra kanꞌ mxkwen xka yu kunan ꞌin taꞌa yu: ―¿Ja ntseen ꞌin Ndiose sikwa a? Suꞌwa ti nu tiꞌí ndijian taꞌa snaan ni ―ndukwin yu ꞌin taꞌa kunan yu―.

⁴¹Ñi ꞌa ndiꞌin chaꞌ ta neꞌ nu tiꞌí ꞌñaan, chaꞌ kanꞌ ndiꞌin chaꞌ ka ꞌñaan siꞌya chaꞌ kuxi nu yꞌnian; loꞌo yu re, ja ska chaꞌ kuxi yꞌni yu re.

⁴²Bra kanꞌ ykwiꞌ yu kanꞌ loꞌo Jesús: ―Yu kula Jesús ―ndukwin―, tyuꞌwi tiiꞌ ꞌñaǎn xa nu tyisnan chaꞌ kaa ndloo ―ndukwin yu kunan kanꞌ.

⁴³Mxkwen Jesús ꞌin yu bra kanꞌ: ―Chañi chaꞌ nchkwiǐnꞌ loꞌoo ―ndukwin―, ti kwiꞌ tsan ni ka tyiꞌiin loꞌoǔn la seꞌen suꞌwe ꞌa, seꞌen ndiꞌin Ndiose nde niꞌ kwan ―ndukwin Jesús ꞌin yu.

⁴⁴Ndiꞌya kwan ngwa, bra kanꞌ ngwa tla tyukwi ñaꞌaan chalyuu; ngwa tla sa ñaꞌan yaꞌ nu mdiya bra wa snan siin,

⁴⁵loꞌo ngwa tla loo kwichaa bra kanꞌ. Teꞌ tlyu nu ndukwi niꞌ lyaa tnun kanꞌ, mdoꞌo yuꞌwe teꞌ kanꞌ jluꞌwe la bra kanꞌ.

⁴⁶Loꞌo kwen ꞌa msiꞌya Jesús: ―Stiǐn, tiꞌyaa kasiya ꞌñaǎn ―ndukwin yu. Bra wa ykwiꞌ yu chaꞌ kanꞌ, bra ti ngujwi yu bra kanꞌ.

⁴⁷Bra nu naꞌan capitán ꞌin sndaru romano sa ñaꞌan ngwa chaꞌ kanꞌ, bra kanꞌ yꞌni tnun yu ꞌin Ndiose. Nde ñaꞌan ykwiꞌ yu bra kanꞌ: ―Chañi chaꞌ ja mdiꞌin kiꞌya ꞌin ayman re siyaꞌ ti ―ndukwin capitán ꞌin sndaru kanꞌ.

⁴⁸Nchga nten nu ndiꞌin nde kwa bra kanꞌ, xa wa naꞌan neꞌ nchga chaꞌ nu ngwa kanꞌ, mdoꞌo neꞌ ndyaa neꞌ bra kanꞌ. Mjiꞌin neꞌ ndukunꞌ neꞌ tijyan tiye neꞌ ndyaa neꞌ chaꞌ xiꞌin ꞌa tiꞌ neꞌ.

⁴⁹La kanꞌ nganun nchga taꞌa suꞌwe nsuꞌwi Jesús nde seꞌen nduun wsi, loꞌo neꞌ kunaꞌan nu wa mdaꞌan loꞌo yu ti bra nu mdyisnan ti tñan ꞌin yu nde Galilea, nganun neꞌ kanꞌ tijyuꞌ ti ñaꞌan kwiꞌya neꞌ chaꞌ nu nchka kanꞌ.