Luke 23:33-49

³³Renh-rnem rernem atnwenheynew apwert anyent-warl itnan Akarnng. Apwert ikwer-itwew Jesus-itwew rernem arnkwan lhelp-lhelew. Atanthew-anem arwerl iylpeyl-atherr-warl, rnkernemel Jesus-enp-antey. Artwa apmwa atherr-then rnkernew akwerrant-atherr, renh ampepewelemel.

³⁴Jesus itnywenemel angkew, “Akngeyay, akwerrparl rernem. Rernem iterl-arey-angenh, apmwel-ayeth mpwareyel. Apmwa irrarlka ikwer-rnem-wety.” Artwa ahawarr-rnemap ntwelhelerrenh, ampwal iwemel namp-akert, Jesus-wenh arnkwa antengeleyew.

³⁵Akngerr rtnenherrenh-antey, Jesus arntarnt-arenh, aynterarrerrenharl arwerl-itwew. Artwa Jew alkenh-rnemelan renh arrkentelhelenh irrpeltherremel alakenh, “Ra ingwer-rneman itethelew ipmepenh. Rap ament itethelhelemer ipmewety. Inngang ran artwa Christ, Akngeyelarl arretengelew anewantherr, ra ahern nhewarl thweneyew? Rap atwarremer arwerl yanh-they!”

³⁶Artwa ahawarr-rnemel renh arrkentelhelenh arrpemarl alakenh, “Ngkwarl tyekert antywa anewantherr-itwel!

³⁷Inngang ngan atyetyart Jew-rnemew-artey? Anantherr iterl-areyew! Atwarra arwerl yanh-they!”

³⁸Arwerl tyeylp arrernew arwerl iylpeyl-atherr ikwer-warl. Tyeylp ikwer-warl alakenh-anyem ingkwernew, “Artwa nhanyem atyetyart Jew-rnem-wenh.”

³⁹Artwa apmwa anyentelan Jesus ra arrkentelhelenh arrpemarl. “Nheng nga artwa Christ. Atwarra arwerl-they, atwarrelhelemel aylernenhanth-then!”

⁴⁰Artwa apmwa ingwerelan renh iltew. “Ipmelha, atherrelerl-aney-angenh! Nga atererremer Akngey-wety! Anantherr ilweyew-anem arwerl nhenh-rnemel!

⁴¹Kelarl aylewanthan mwerrarl ilweyew alakenh, apmwel-ayetharl mpwarew-penh. Artwa nhenhan apmwelheley-angenh, arrangkw.”

⁴²Jesus aremel ra angkew, “Iterra atyeng, ngarl rlengk-antey alpem irrwerl, atyetyart alkenh aney-alpeyew.”

⁴³Ra tyernew, “Atha ngenh arraty ileyel. Rlengk-antey aylanth alpem, aney-alpeyew apmer mwerr-angker-itwew irrwerl.”

⁴⁴Arlta ikwerel-antey arlta ampepel atemwengkerreyelpew. Nthakenh ingkeny arey-angenh. Apmer arrpanenh-itwew atemwengkerrew arlta ampep-they atwerrpew-atety.

⁴⁵Ingkeny arrtyerneyelpew-anem angkeparl. Rag ilkwa aynterarrerrenh tyaty ilkwitwew. Atemwengkerrewel, rap ilterrelhew ament-antey ampep-angkwarr irrwerl-they kwenel-athek.

⁴⁶Jesus arlkew, “Akngey atyenhay! Ayeng ilweyel-anem! Inweng atyenh arntarnt-ara!” Ra alakenh angkew-penh, rap ilwew-anem.

⁴⁷Atyetyart artwa ahawarr-rnem-wenhel arenh arrer-they. Rap Akngey nakew alakenh angkemel, “Inngarl artwa nhenhan mwerr. Ran apmwelheley-angenh, arrangkw.”

⁴⁸Akngerr akarrerrew. Rernem aytareyew, artwernem irrpety arwerl-warl aynterarrewew, artwa apmwa atherr Jesus-anem. Rernemap amperrngerrew, alpew-anem apmer-warl, artewentyel artnemel.

⁴⁹Jesus-ew apelty-rnem ikwerenh-rnem-then rerneman arleng-they arenh. Arelh Galilee-areny-rnemel arenh arleng-they arrpemarl, rernemarl apetyew Jesus-el-arleng apmer ikwer-they.