San Lucas 23:33-49

³³Jare yugüɨraa uvãe Ãcacüerenda jee vae pe. Jayave joco pe sundaro reta uicutu curusu re Jesús jare cuimbae reta icavi mbae vae uyapo vae. Oñono reta penti Jesús iyacata cotɨ jare ĩru iyaso cotɨ.

³⁴Jayave Jesús jei: —CheRu, embɨasa chupe reta. Uicuaa'ã mbae uyapo ñugüɨnoi vae —jei. Jayave sundaro reta uyuguari Jesús jemimonde re, uicuaa vaerã mbae nunga penti penti güɨraa iyupe vaerã.

³⁵Jare tenta guasu pegua reta uyemboɨ ñugüɨnoi jocoropi umae Jesús re. Jare tenta guasu pegua reta itenondegua joco pe ñugüɨnoi vae reta oyoyai Jesús. Jei reta: —Jae uepɨ ĩru vae reta. Añave tuyerepɨ, jae co Cristo yave, jae co Tumpa uiparavo vae yave —jei reta.

³⁶Jare sundaro reta vi oyoyai Jesús. Oya reta jese jare umee vinagre chupe.

³⁷Jare jei reta: —Nde co jae judío reta juvicha guasu yave, iyerepɨ.

³⁸Jare oñono reta curusu re Jesús iñãca iárambo uyecuatía jesegua vae: “Cua co jae judío reta juvicha guasu.” Uyecuatía oĩ griego iñee pe jare latín pe jare hebreo iñee pe.

³⁹Jare penti cuimbae icavi mbae vae uyapo vae uyecutuca vae uñeengata Jesús pe. —Nde co jae Cristo, Tumpa ombou vae yave, iyerepɨ jare orerepɨ vi —jei.

⁴⁰Ẽrei ĩru cuimbae uñeengata chupe. —¿Ndequɨye'ã pa Tumpa güi? Echa'ã nde vi nemano neĩ cua ĩru vae rami —jei—.

⁴¹Jare jupi co yande ñamano vaerã. Echa'ã yande ñamanota ñaĩ icavi mbae vae yayapo vae jeco pegua. Ẽrei cua cuimbae uyapo'ã mbae icavi mbae vae —jei.

⁴²Jayave jei Jesús pe: —Jesús, nemandúa cheré ndeporoyocuia pe neĩ yave.

⁴³Jayave Jesús jei chupe: —Añete che jae ndeve, cua ara neĩta che ndive ara pe —jei.

⁴⁴Jare guarasɨ ara mbɨte güive mbapɨ ora rupi uñemɨpɨ̃tumimbi opaete ɨvɨ pe.

⁴⁵Guarasɨ jembipe'ã etei. Jayave Tumpa jo umbɨyao vae osoro mbɨte rupi.

⁴⁶Jayave Jesús tanta usapɨcai. Jayave jei: —CheRu, amee ndeve cherecove. Jare cua jei ma yave, umano.

⁴⁷Jare cien sundaro vae juvicha joco pe oĩ vae uecha mbae uyeyapo vae. Jayave umbɨadora Tumpa jare jei: —Añetete co, cua cuimbae co jae jupi vae.

⁴⁸Jare opaete joco pe yatɨ vae reta vi uecha mbae uyeyapo vae jare ocua iyee ipɨtía re. Jayave opaete vae yugüɨraa ye jenta jenta pe.

⁴⁹Jare opaete Jesús uicuaa vae reta jare cuña Jesús ndive Galilea güi yugüeru vae reta uyemboɨ ñugüɨnoi mbɨrɨ curusu güi. Umae ñugüɨnoi mbae uyeyapo vae re.