1O Ježiš phenďa peskere učeňikenge: “Mušinen pes te ačhel ola veci, so cirden le manušen pro binos, ale vigos ole manušeske prekal kaste oda avel.
2Feder leske uľahas te leske thodehas baro bar pre meň a čhidehas les andro moros, hoj te kerel tele le pačabnastar jekhes kale ciknorendar.
3Merkinen tumenge! Te kerďahas tiro phral binos, priphen leske, a te pes visarela le binostar, odmuk leske.
4A te eftavar andro džives kerďahas binos pre tute, a eftavar andro džives pal tu avľahas a phenďahas: ‘Prebačin, odmuk mange’ – odmukeha leske!”
5O apoštola phende le Rajeske: “De amen bareder pačaben!”
6O Raj phenďa: “Te tumen uľahas o pačaben sar o horčično semenos, phenďanas kale stromoske: ‘Le tut avri the le koreňenca a zasadzin tut andro moros,’ šunďahas tumen.”
7“Te hin tumen sluhas, savo orinel abo pasinel, ko tumendar leske takoj phenel, sar avel pal e maľa: ‘Av, beš tuke paš o skamind?’
8Sigeder leske phenela: ‘Pririchtin mange e večera, le pre tu e leketa a ker pašal ma, medik me na dochava a na dopijava. Tu paľis chaha the pijeha’.
9Či paľikerel ole sluhaske vaš oda, hoj kerďa oda, so leske sas phendo?
10Avke the tumen, te kerena savoro, so tumenge sas phendo, phenen: ‘Sam ča o sluhi, save peske na zasogaľinas (na zaslužinas) ňič. Kerďam ča oda, so mušinďam te kerel.’ ”
11O Ježiš džalas andro Jeruzalem prekal e Samarija the Galileja.
12Sar doavľa andre varesavo gav, arakhle pes leha deš malomocne murša, save dural ačhenas
13a zoraha vriskinenas: “Ježiš! Učiťeľina! Av ke amende jileskero!”
14Sar len dikhľa, phenďa lenge: “Džan a sikaven tumen le rašajenge!” A sar džanas, sas obžužarde andral o malomocenstvo.
15Jekh lendar, sar dikhľa, hoj sasťiľa avri, avľa pale a zorale hangoha lašarelas le Devles.
16Le mujeha banďiľa dži ke phuv paš le Ježišoskere pindre a paľikerelas leske. A ov sas Samaritanos.
17Akor phenďa o Ježiš: “Či na sasťile avri deš džene? Kaj hine okla eňa džene?
18On na avle pale, hoj te lašaren le Devles, ča kada cudzincos?”
19Phenďa leske: “Ušťi a dža, tiro pačaben tut sasťarďa.”
20Sar lestar o Farizeja phučle, kana avela o kraľišagos le Devleskero, ov lenge odphenďa: “O kraľišagos le Devleskero na avela avke, hoj les te dikhas.
21Aňi na phenena: ‘Dikh, kade hino!’ abo ‘Kode hino!’ Bo o kraľišagos le Devleskero hin maškar tumende!”
22Phenďa le učeňikenge: “Avela ajso časos, hoj peske mangena te dikhel jekh le dživesendar le Čhas le Manušeskeres, ale na dikhena.
23Phenena tumenge: ‘Dikh, kode hino!’ vaj ‘Kade hino!’ Ale tumen ma džan, ma denašen pal lende!
24Bo avke, sar o perumos demel a dičhol savoro pal jekh agor pre phuv dži pre aver, avke ela the akor, sar avela o Čhavo le Manušeskero andre peskero džives.
25Ale ešeb mušinel but te cerpinel a te el odčhido kale pokoleňjostar.
26Sar sas andro Noachoskere dživesa, avke ela the andro dživesa, sar avela o Čhavo le Manušeskero.
27Chanas, pijenas, lenas romňijen a džanas romeste dži andre oda džives, sar geľa o Noach andro korabos. Akor avľa e potopa a savore mule.
28Avke sas the andro dživesa le Lotoskere: Chanas, pijenas, cinenas, bikenenas, sadzinenas a ačhavenas khera,
29ale oda džives, sar geľa o Lot avri andral e Sodoma, o Del bičhaďa e jag the sira andral o ňebos a savore mule.
30Avke ela the andre oda džives, sar pes sikavela o Čhavo le Manušeskero.
31Ko ela oda džives pre strecha a leskere veci ena andro kher, te na avel tele len te lel. Aňi oda, so ela pre maľa, pes te na visarel pale!
32Leperen pre Lotoskeri romňi!
33Sako, ko kamľahas te zachraňinel peskero dživipen, oda les našavela a sako, ko les našavela, oda les zachraňinela.
34Phenav tumenge: Odi rat duj džene ena pro haďos: Jekh ela ilo a dujto ačhela.
35Duj džuvľija jekhetane erňinena: Jekh ela iľi a dujto ačhela.
36Duj džene ena pre maľa, jekh ela ilo a dujto ačhela.”
37On leske odphende: “Kaj, Rajeja?” Ov lenge odphenďa: “Ode, kaj ela o ťelos, ode pes skidena the o supi.”
