San Lucas 23:33-49

³³Tsiñee lëë xaa ptsiñ laañee lë Calavera, lëë xaa pkëë Jesús lo crusy, ni lëë xaa pkëë chop xaa mal go kwi Jesús, tu xaa nëzli, stu xaa nëzpeg.

³⁴Aan lëë Jesús chëb: —Tat Tios, beeñ kchë xaa re perdón, porque nandy xaa pe cos chuuñtsyey xaa. Aan lëë soldad kwloo xab Jesús rif parñee dyon cho xaa kchalo.

³⁵Lëë meñ kukuy aan axte wi kchë xaa xñabey kwtsityni xaa xñee: —Pteelaa xaa meñ. Kyety xaa lo crusy na dyon deelñee nli nii lëë xaa nak Crist nii pxaal Dios.

³⁶Wi soldad kwtsityni Jesús. Ptee xaa viñ nyi lo Jesús,

³⁷ni chëb xaa lo xaa: —Deelñee nli lii nak xrey meñ Israel, pteelaa lii.

³⁸Ni kwë blalan tiits kik xicrusy Jesús nii xñee: “Lëë xaa re nak xrey meñ Israel.”

³⁹Wi tu xaa mal nii kwë kwi xaa kwlootsyetsy xaa chëb: —Deelñee nli nii lii nak Crist, pteelaa lii ni pteelaa lëë noo.

⁴⁰Per lëë stu xaa mal nii wi kë lo crusy kwëntseeb lo xcombañer chëb: —¿Pe xtsyeebtyoo Dios nawen? ¿Pe xyeñdyoo nayak nii lo crusyak kël?

⁴¹Lëë no busy porñee beeñ no mal ngo no tizh no xfalt no lo crusy. Per lëë xaa re, ni tu pe karty kuuñtsyey xaa.

⁴²Tsigo lëë xaa chëb lo Jesús: —Psaladzy naa tsiñee lëël sob kñabeyoo.

⁴³Lëë Jesús chëb: —Nli xñen nii natse kazh lëël së kyo no kpaa.

⁴⁴Tsiñee kol xwe ngbidz lëë lo kislyu pkyey, aan lëëw byaani axte las tres.

⁴⁵Ni lëë lo ngbidz pkyey ni lëë ladx nii kë leñ lidzy Dios pchos nsoli.

⁴⁶Loxsye ngo lëë Jesús kwchuptsyë ni lëë xaa chëb: —Tat Tios, kokni xkyalbinin. Aan lëë xaa kuty.

⁴⁷Tsiñee lëë xaa nii xñabey lo soldad kon kchë nii kok, lëë xaa biily lay lo Dios, chëb xaa: —Nli nii kwyody xtol xaa re.

⁴⁸Kchësy meñ nii kwey ni kon kchë nii kok xyaasy styoo bi.

⁴⁹Per lëë kchësy xaa nii byuumbey Jesús ni kchë kwnaa nii pchoonal xaa destye Galilea kwche sit buy.