Luuka 23:33-49

³³Nde ɓe njottinoo nokku biyeteeɗo Laalagal Hoore ndee, ɓe tonti mo e leggal bardugal, kanko e yanooɓe ɗiɗon ɓee, gooto ɲaamo makko, goɗɗo oo nano makko.

³⁴O wii: —Baaba, yaafa ɓe sabi ɓe anndaa ko ɓe ngaɗata. Nii ɓe pecciri kaddule makko urwa.

³⁵Yimɓe ndarii ɗon ana ƴeewa. Hooreeɓe ɓee duu ndarii ana njaayra mo, ana mbiya: —O biltii woɓɓe, o bilta hoore makko so o Almasiihu, Cuɓaaɗo Laamɗo oo!

³⁶Sordaasi'en ɓee duu njaayri mo, ngaddani mo biineegiri,

³⁷ana mbiya: —So aan woni kaananke Yahuudiyankooɓe oo, biltu hoore maa!

³⁸Tawi ana winndii e tiimde hoore makko: OO YO KAANANKE YAHUUDIYANKOOƁE.

³⁹Gooto e yanooɓe ɗiɗon tontidaaɓe e makko ɓee ana ɲiŋa mo, ana wiya: —Wanaa aan woni Almasiihu naa? Biltu hoore maa, mbiltaa min minen duu!

⁴⁰Kaa goɗɗo oo jahii e oo too, wii: —A hulataa Laamɗo naa? Aan e makko fuu, on potu jukkungo.

⁴¹Enen, en keɓii ko kaandu-ɗen, jukkeede men yo goonga jaati, sabi ko ngollu-ɗen tan njoɓete-ɗen. Kaa kanko, o waɗaali fay huunde ko dagaaki.

⁴²Caggal ɗum, o wii: —Iisaa, miccito-ɗaa kam so a laatitike kaananke.

⁴³Iisaa wii mo: —Miɗo haalane goonga: hannde jaati a wondoyan e am ley alijenne.

⁴⁴Wakkati hakkunde naange, nimre waɗi e leydi ndii fuu faa wakkati yamnde tati kiikiiɗe,

⁴⁵naange niɓɓi, heedoode faliinde ley Suudu Dewal Mawndu ndee seekii, laatii taƴe ɗiɗi.

⁴⁶Iisaa wulli wullaango manngo, wii: —Baaba, mi tummbii yonki am kii e junngo maa. O haali ɗum tan, o ɗali aduna.

⁴⁷Nde hooreejo sordaasi'en oo yii ko waɗi koo ndee, yetti Laamɗo, wii: —So goonga nii, oo neɗɗo yo pooccitiiɗo!

⁴⁸Jamaa garnooɗo ƴeewde oo fuu, nde yiinoo ko waɗi koo ndee, wirfitii terɗe mum ana mbaati.

⁴⁹Kaa annduɓe mo ɓee fuu, ndarii to toowti ana ƴeewa. Rewɓe jokkunooɓe e makko gila leydi Galili ɓee ana e maɓɓe.