Lucas 23:33-49

³³Pegdateng dan doton te bontod iningedanan Tòlan te Olo, inlansang dan sikandin diyà te kros. Inlansang heman se dowa otaw medaet kidoen te tangkil din, aw si Jesus diyà te tengà-tengà.

³⁴Migtawal-tawal si Jesus tepad te menge otaw miglansang kandin diyà te kros, kagi din, “Amà, pegwedadi se salà dan, so wedà dan ketegahi aw eden se ininang dan seini.” Penga te peglansang dan ki Jesus diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan.

³⁵Timengteng kandin se kedita te otaw netipon kidoen. Meneng se menge obanen te Judiyo, migbaet-baet dan kandin, kagi dan, “Migtabang sikandin te doma otaw netigdaan amon eked dan pa kematay. Kitaen tadon den aw meketabang sikandin te kandin pegkeotawun amon eked kematay. Kitaen tadon heman aw benal sikandin se Misiyas insogò te Timanem, sìyan tapay pinemallì din.”

³⁶Migtompuyus heman se menge sondalo kandin. Dimoton dan kandin amon ipeinem dan kandin se bino sinengedan te wayeg.

³⁷Minikagi dan, “Aw ontò ka Selotan te menge Judiyo, tebangi se kamno pegkeotawun.”

³⁸Doen heman solat insawol doton diatas te olo din, kagi niyan, “Seini se Selotan te menge Judiyo.”

³⁹Se sebad otaw medaet impetangkil ki Jesus, migtompuyus sikandin, kagi din, “Petega-tegahi kay te ontò ka Misiyas. Tebangi se kamno pegkeotawun, aw tebangi kay heman.”

⁴⁰Meneng migsagda se sebad, kagi din, “Ikà egtompuyus te Timanem. Keilangan megselsel ka diyà te Timanem, so onawa se pelumun dimateng den diyà kenitadon.

⁴¹Keilangan ipelumun ki den, so yan se detengan te medaet ininang ta. Meneng wedad palos medaet ininang te doma ta seini.”

⁴²Penga niyan, minikagi sikandin diyà ki Jesus, “Keidowi a bag aw lomowan ka.”

⁴³Minikagi si Jesus, “Eneng-enengi se kagi ko kamno. Kwani seini, megdoma ka kanak doton te langit.”

⁴⁴Pegkealas dosi te aldaw, migkengitngit se langit aw tanà lamig alas tris te meapon,

⁴⁵so wedà senang se aldaw. Tigkan heman nelisì se kayad kidoen te tengà-tengà te dakel simbahan te Jerusalem.

⁴⁶Penga niyan, timawal si Jesus te dakel se kagi din, “Amà, isalig ko den se pedowan ko diyà kamno.” Penga te peg-ikagi din kenyan, nematay sikandin.

⁴⁷Kinità te kapitan te sondalo se kepelahan neinang te pegkematay i Jesus, aw dimuyun sikandin te Timanem, kagi din, “Ontò mèpiya se otaw sìyan.”

⁴⁸Nayan, se kedita te otaw netipon kidoen, pegkità dan te kedita niyan neinang, migsiolì dan aw dinapì dan se kagpa dan tandà te lano dan.

⁴⁹Meneng se kedita te sigalak i Jesus aw menge bayi timaking kandin lekat te Galiliya, timindeg dan te kenà mediyò te kros, aw kinità dan se ininang kandin.