1O Ježiš pes zadikhľa, sar o barvale denas o love andre le chramoskeri pokladňica.
2Dikhľa the varesava igen čora vdova, sar ode čhiďa duj churde minci.
3A phenďa: “Čačipen tumenge phenav, hoj kadi čori vdova čhiďa buter sar savore.
4Bo kala savore denas olestar, so lenge ačhelas, ale oj čhiďa peskere čoripnastar savoro, so la sas pro dživipen.”
5Sar varesave učeňika vakerenas pal o chramos, hoj hino avrišukaľardo šukare barenca the ole darenca, so dine o manuša prekal o Del, phenďa:
6“Avena dživesa, sar olestar, so akana dikhen, na ačhela bar pre bareste. Sa ela tele čhido.”
7Phučle lestar: “Učiťeľina, kana oda ela? Pal soste prindžaraha, hoj oda imar hin pašes?”
8Ov phenďa: “Merkinen, hoj tumen vareko te na klaminel. Bo ena but ajse, save avena andre miro nav a phenena: ‘Me som o Kristus,’ the: ‘Odi ora imar hin pašes.’ Ma džan pal lende!
9Sar šunena pal o maribena the pal o vzburi, ma daran! Bo oda pes mušinel ešeb (peršo) te ačhel, ale na ela takoj o koňec.”
10Paľis lenge vakerelas: “O narodos džala pro narodos a o kraľišagos pro kraľišagos,
11e phuv igen razisaľola a ela bari bokh the nasvaľibena pre varesave thana. Sikavena pes veci, so anena bari dar, the bare znameňja andral o ňebos.
12Ale mek angloda savoreste phandena tumen andre a džana pre tumende. Dena tumen andro sinagogi the andro berteni a ľidžana tumen anglo kraľa the anglo vladara vaš miro nav.
13Oda pes tumenge ačhela vašoda, hoj te den o sveďectvo.
14Mištes achaľon, hoj na kampel pes tumenge anglal te trapinen, so phenena pre peskeri obrana,
15bo me tumen dava ajse lava the goďi, pre save ňiko našťi odphenela pale a našťi obačhela ňiko olendar, save pre tumende džana.
16Zradzinena tumen tumare daja the dada, o phrala, o pašutne the o prijaťeľa – a varekas tumendar the murdarena.
17Savoredžene tumen našťi avri ačhena vaš miro nav.
18Ale mek aňi jekh bal pal o šero tumenge na našľola.
19Te ľikerena avri, chudena peskero dživipen.
20Sar dikhena, hoj o armadi hine rozačhade pašal o Jeruzalem, akor džanena, hoj sigo les rozmarna a ela tele čhido.
21Akor ola, save ena andre Judsko, mi denašen upre pro verchi. Ola, save ena andro foros, mi džan odarik het a ola, save ena pro maľi, te na džan andro foros.
22Bo oda ena o dživesa, sar o Del marela peskere manušen, hoj pes te ačhel savoro, so hin pisimen.
23Andre ola dživesa ela igen phares le khabňenge the ole džuvľenge, save den te pijel le čhavoren. Bo ela baro pharipen pre phuv a e choľi ela pre kala nipi.
24Murdarena varesaven le šabľenca; avren phandena andre a odľidžana len maškar savore narodi. A o Nažidi ena upral o Jeruzalem a zňičinena les, medik pes na pherarela lengero časos.
25O znameňja ena pro kham, pro čhon the pro čercheňa. O narodi pre phuv ena andre dar a na džanena so te kerel, bo igen hučinela o moros the o vlni.
26O nipi merena daratar olestar, sar užarena, so avela pro svetos, bo o ňeboskere zora peha čhalavena.
27Akor dikhena le Čhas le Manušeskeres te avel andre chmara andre bari zor the andre slava.
28Sar pes oda chudela te ačhel, ušťen a hazden upre o šere, bo pašes hin tumaro spaseňje.”
29Phenďa lenge kada podobenstvo: “Dikhen pro figovňikos the pre savore stromi!
30Sar dikhen, hoj imar aven avri o prajti, džanen, hoj o ňilaj hino pašes.
31Avke the tumen, sar dikhena, hoj pes oda ačhel, džanen, hoj pašes hin o kraľišagos le Devleskero.
32Čačipen tumenge phenav, hoj kada pokoleňje na predžala, medik pes kada savoro na ačhela.
33O ňebos the e phuv našľona, ale mire lava šoha (ňikda) na našľona.
34Merkinen pre tumende, te na gondoľinen andro jile ča pal o but chaben, pijiben the starišagi, so hin andre kada dživipen – hoj oda džives te na avel jekhvareste pre tumende.
35Bo avela pre savore manuša, save bešen pre phuv, jekhvareste sar e pasca.
36Vašoda ma soven, ale furt tumen modľinen ko Del, hoj te denašen savorestar, so pes majinel te ačhel a hoj te ačhen anglo Čhavo le Manušeskero.”
37Prekal o džives sikavelas andro chramos a rači džalas avri a presovelas pro Olivovo Verchos.
38A savore nipi avenas sig tosara andro chramos, hoj les te šunen.
