Lefii 7:2-28

²Lonte nte tǝ tɑɑ pɑ lɛntǝɣɩ kɔtɑsɩ nsi kɔkɔ lusɑɑ tɔ, sɩ tɔlɑ tɔɣɔ pɑɑ lɛntɩ ɩsɑɣɑtʋ hɩɩsʋɣʋ sɔɔsɩ nyǝntɛ tɔtɔ. Ɩlɛnɑ kɔtʋlʋ ŋmɩɩsɩ tǝ cɑlǝm kɛ́ kɔtɑɣɑ tǝlɑtɛ kɔŋkɔmǝŋ tɔɔ.

³Ɩlɛnɑ pɑ́ kɔɔlɩ kpǝntɛ nim cɔlɔ nim cɔlɔ tǝnɑ. Pǝ kpɑɣɑʋ pǝ tǝnɑ mpi pǝ pɑmɑ pǝ tɑɑ lotu tɔɔ tɔ,

⁴nɑ timpee nɑɑlɛ nɑ ɑ nim, nɑ kɔŋkɔmǝŋ tɑɑ nyǝm. Ɩsɩɩ pɑ lǝsʋɣʋ hɔɔlɛ nɑ pǝ́ kpɛnnɑ timpee tɔ.

⁵Ɩlɛnɑ kɔtʋlʋ nyɑɣɑsɩ pǝ tǝnɑɣɑ kɔtɑɣɑ tǝlɑtɛ tɔɔ. Tɑɣɑnʋɣʋ kɔtɑɣɑ ntɛ.

⁶Kɔtǝlɑɑ tɛɛsɩ tɑɑ ɑpɑlɑɑ tike kɑ́ tɔɣɔnɑ nɑntʋ ntǝɣɩ lonte nte tǝ wɛnɑ tǝ mpɑɑ tɔ tǝ tɑɑ. Mpi tɔ, tǝ kɛ́ kɑtɛ tɑɑ kɑtɛ pʋlʋɣʋ.

⁷Tɑɣɑnʋɣʋ kɔtɑɣɑ nɑ ɩsɑɣɑtʋ hɩɩsʋɣʋ nyǝŋkɑ pǝ kʋsǝsɩɩtʋ wɛ kʋlʋmtʋ kɛ́. Kɔtʋlʋ wei ɩ lɑpɑ pǝ tǝmlɛ tɔ, ɩnɩ ɩ tǝnnɑ pǝ nɑntʋ kʋkɑɑsǝtʋ.

⁸Ye ɩsɩɩ nɔɣɔlʋ kɔnɑ kpǝntɛ sɩ ɩ lɑkɩ kɔtɑɣɑ ŋkɑ kɔkɔ lusɑɑ tɔ. Kɔtʋlʋ wei ɩ lɑpɑ pǝ tǝmlɛ tɔ, ɩnɩ ɩ tǝnnɑ tɔnʋɣʋ.

⁹Ye pɑ kɔnɑ Ɩsɔ kɛ tɔɣɔnɑɣɑ kʋhɑʋ, ɩsɩɩ potopoto, yɑɑ kɑkɑlɑsɩ, yɑɑ pɛtɛpɛtɑɣɑ, yɑɑ kʋtoŋǝm, ɩlɛ kɔtʋlʋ wei ɩ lɑpɑ pǝ tǝmlɛ tɔ, ɩnɩ ɩ tǝnnɑ.

¹⁰Amɑ pǝ kɑɑsɑ tɔɣɔnɑɣɑ kʋhɑɑŋ lɛlǝŋ tɔ. Pɑɑ nim kʋsitɑɣɑ yɑɑ kpɛtɛ nyǝŋkɑ, kɔtǝlɑɑ tɑlǝɣǝnɑ pǝ tǝnɑɣɑ teitei.

¹¹Nɔɣɔ kʋlʋmɑɣɑ kpɛntʋɣʋ kɔtɑsɩ nsi pɑ lɑkɩ Tɑcɑɑ tɔ sɩ kʋsǝsɩɩtʋ ntɔ.

¹²Ye sɛɛtʋ kɔtɑɣɑ kɛ pɑ lɑpɑ, pɑ pukinɑ tɔtɔɣɔ kʋkʋsʋm fɛɩ kɑkɑlɑsɩ nsi pɑ sitɑ nim tɔ, pǝ pɛtɛpɛtɑsɩ nsi sɩ tɔɔ pɑ tɑɑ-wɩ tɔ, nɑ mʋlʋm kʋpɑm mpi pɑ nuɣutinɑ-wɩ tɔ pǝ kɑkɑlɑsɩ.

¹³Pǝlɛ pǝ pɑɑsi, pɑ sɔɔsǝɣɩ kʋkʋsʋm potopoto kɛ sɛɛtʋ kɔtɑɣɑ ŋkɛ kɑ tɔɔ.

¹⁴Ɩlɛnɑ pɑ́ lǝsɩ kɑkɑlɑsɩ nsɩ sɩ tɔm tooso tɔɔ kɛ́ kʋlʋmɑɣɑ kʋlʋmɑɣɑ, nɑ pɑ́ kpɑɑsɩ ɩsɔtɑɑ kɛ Ɩsɔ kɔtɑɣɑ tǝlɑtɛ kiŋ. Ɩlɛnɑ kɔtʋlʋ wei ɩ ŋmɩɩsɑ kpǝntɛ cɑlǝm kɛ tǝ kɔŋkɔmǝŋ tɔɔ tɔ, ɩ́ kpɑɣɑ sǝlɛ.

¹⁵Ye sɛɛtʋ kɔtɑɣɑ kpǝntɛ nɑntʋ ɩlɛ, pǝ wɛɛ sɩ kʋyɑkʋ ŋkʋ kʋ mɑɣɑmɑɣɑ kɛ pɑɑ tɔɣɔ-tɩ, pǝ fɛɩ sɩ tǝ́ fe tɛʋ.

¹⁶Ye ɩsɩɩ nɔɣɔlʋ lɑpɑ nɔɣɔ kʋlʋmɑɣɑ kpɛntʋɣʋ sɔɔsɩ, yɑɑ ɩ kɑ sɩɩ nɔɣɔ, ɩlɛnɑ ɩ lɑ pǝ sɔɔsɩ, pɑ pǝsǝɣɩ nɑ pɑ́ tɔɣɔ pǝ nɑntʋ kɛ kʋyɑkʋ ŋkʋ, nɑ pɑ́ tɔɣɔ pǝ kʋkɑɑsǝtʋ kɛ pǝ tɛʋ kʋfemuɣu.

¹⁷Ye tǝ tɑlɑ kʋyɑkʋ tooso nyǝŋkʋ wule, ɩlɛ pǝ wɛɛ sɩ pɑ́ wɔ-tǝɣɩ kɔkɔ.

¹⁸Wei ɩ́ tɔɣɔ pǝ nɑntʋ kɛ kʋyɑkʋ tooso nyǝŋkʋ wule, Tɑcɑɑ kɑɑ mʋ ɩ kɔtɑɣɑ. Pǝyele ɩ kɔtɑɣɑ kɑɑ wɑɑsɩ tɔtɔ. Pǝ pǝsɑ kʋsɔɣɔtʋ pʋlʋpʋ kɛ́. Ye wei ɩ tɔɣɑɑ pǝ mǝlɩ ɩ nyʋɣʋ tɑɑ.

¹⁹Ye pǝ nɑntʋ ɩ́ tokinɑ ɑsilimɑ pʋlʋpʋ, tǝ fɛɩ tɔɣɔʋ tɔtɔ. Kɔkɔ kɛ pɑɑ nyɑɣɑsɩ-tɩ. Pǝ wɛɛ sɩ mpɑ pɑ fɛɩnɑ ɑsilimɑ tɔ, pɑ tike pɑɑ tɔɣɔnɑ pǝ nɑntʋ.

²⁰Ye ɩsɩɩ nɔɣɔlʋ wɛ ɑsilimɑ tɑɑ, nɑ pɑ́ lɑ Tɑcɑɑ kɛ nɔɣɔ kʋlʋmɑɣɑ kpɛntʋɣʋ kɔtɑɣɑ nɑ pʋntʋ tɔɣɔ, pǝ wɛɛ sɩ pɑ́ lǝsɩ-ɩ Ɩsɛɣɛlɩ kpekǝle tɑɑ.

²¹Mpʋ tɔtɔɣɔ ye nɔɣɔlʋ tokinɑ ɑsilimɑ tʋ, pɑɑ yʋlʋ, pɑɑ kpǝntɛ. Ɩlɛnɑ pʋntʋ tɔɣɔ kɔtɑɣɑ ŋkɛ kɑ nɑntʋ. Pɑɑ lǝsɩ-ɩ tɔtɔɣɔ Ɩsɛɣɛlɩ kpekǝle tɑɑ.

²²Ḿpʋ́ɣʋ́ Tɑcɑɑ tɔmɑ Moisi sɩ:

²³Tɛlǝsɩ Ɩsɛɣɛlɩ nyǝ́mɑ sɩ: Pǝ fɛɩ sɩ ɩ́ tɔɣɔ pʋlʋpʋ nɑntʋ nim. Pɑɑ nɑʋ yɑɑ heu yɑɑ pǝ́ŋ́.

²⁴Kpǝntɛ kʋsǝpǝlɛ, yɑɑ nte pǝ kpɑwɑ nɑ pǝ cǝlɩ tɔ, tǝ nim fɛɩ tɔɣɔʋ. Amɑ ɩ́ pǝsǝɣɩ nɑ ɩ́ lɑnɑ-wǝɣɩ pɑɑ mpi.

²⁵Ye nɔɣɔlʋ tɔɣɔ tɔlɑ nnɑ pɑ lɑkɩ Tɑcɑɑ kɛ kɔtɑɣɑ ŋkɑ kɔkɔ lusɑɑ tɔ kɑ nɑntʋ cǝkɑ nim nyǝŋkɑ, pǝ wɛɛ sɩ pɑ́ lǝsɩ-ɩ Ɩsɛɣɛlɩ kpekǝle tɑɑ kɛ́.

²⁶Mpʋ tɔtɔɣɔ pɑɑ timpiɣi ɩ́ kɑ́ cɑɣɑ, pǝ fɛɩ sɩ ɩ́ tɔɣɔ sumɑɣɑ yɑɑ wontuɣu nɑkʋlɩ kʋ cɑlǝm.

²⁷Ye wei ɩ tɔɣɔ cɑlǝm pǝ wɛɛ sɩ pɑ́ lǝsɩ-ɩ Ɩsɛɣɛlɩ kpekǝle tɑɑ kɛ́.

²⁸Ḿpʋ́ɣʋ́ Tɑcɑɑ tɔmɑ Moisi sɩ: