Kawandila 10

1

2

3

4

5

6

7

8

9

10

11

12

¹Tugitugi na faxa labundɛ xun ma, labundɛ xiri kanama nɛ. Xaxilitareɲa nan xui mɛma dangife xaxilimaya xui ra.

²Xaxilima bɔɲɛ matinse, xaxilitare bɔɲɛ ɲaaxu.

³Xaxilitare a xa xaxilitareɲa masenma nɛ birin bɛ a xa ɲɛrɛ kui.

⁴Xa i xa mangɛ xɔnɔ i ma, i naxa keli i xa wali xun ma, i xa sabari fe xɔrɔxɔɛ rabɔrɔxɔma.

⁵N fe xɔrɔxɔɛ nde fan toxi yi duniɲa ma naxan kelixi mangɛ ma:

⁶A nɔɛ fima nɛ xaxilitare nde ma, banna nde tan mu nɔɛ yo sɔtɔ.

⁷N bara konyi nde to a soe ragima, mangɛ nde fa a ɲɛrɛ a sanyi ra.

⁸Yili ge nɔma birade a xa yili gexi kui, mixi naxan yale tima tɛtɛ ma, bɔximase nɔma na fan xinde.

⁹Mixi naxan gɛmɛ masolima, a nɔma a maxɔnɔde gɛmɛ ra. Mixi naxan yege bɔɔma, a nɔma a maxɔnɔde yege ra.

¹⁰Xa beera kole torixi, a mu ralugan, na a niyama nɛ wali xa xɔrɔxɔ. Xaxilimaya xunnakeli fima mixi ma na ki nɛ.

¹¹Xa bɔximase mixi xin beenun bɔximase suxuma xa a suxu, mixi naxan bɔximase suxuma, a mu geenima.

¹²Hinnɛ gbegbe na xaxilima xa masenyi kui, kɔnɔ xaxilitare tan xa wɔyɛnyi a yɛtɛ bɔnɔma nɛ.

¹³A xa masenyi fɔlɔma lɔnnitareɲa ra, a raɲɔn daxuɲa ra.

¹⁴Xaxilitare xa wɔyɛnyi wuya. Adamadi mu a kolon fe naxan fama fade. Nde a rakolonma fe ra naxan fama a lide?

¹⁵Xaxilitare a yɛtɛ rataganma, hali taa kira, a mu a kolon.

¹⁶Ɲaxankatɛ na taa bɛ naxan xa mangɛ findixi fonike yɔrɛ ra, naxan xa kuntigie kurunma xulunyi tife ra.

¹⁷Ɲɛlɛxinyi na taa bɛ naxan xa mangɛ fatanxi mangɛ bɔnsɔɛ ra, naxan xa kuntigie e dɛgema a waxati ma sɛnbɛ sɔtɔfe ra, e mu siisi.

¹⁸Xa banxi kanyi tunnaxɔnɔ, banxi xunyi birama nɛ, xa a mu a findi tunnabɛxi ra, a xa banxi fama nɛ minide.

¹⁹Mixi donse rafalama nɛ alako a xa ɲɛlɛxin, a wɛni minma nɛ alako a xa sɛɛwa, a kɔbiri sɔtɔma nɛ alako a hayi birin xa fan.

²⁰I naxa mangɛ danka hali i xa maɲɔxunyi kui, i naxa banna danka hali i xa konkoe kui, barima xɔni nde i xui xaninma nɛ, a na fala mixi nde bɛ.