1Ngeni ewe mi emweni chon köl: Won pisekin ettik mi wor walufoch saitenin. Echö än Tafit köl. Äm Samol mi Lapalap, kopwe alisikem, pun esap chüen wor eman chon pin, nge ekewe chon allükülük ra rosola seni lein aramas.
2Iteiten eman me eman a chofana ngeni chon arun. Ra chök eäni kapas atuputup lefiler.
3Amwo ewe Samol mi Lapalap epwe aükätiu ar kapas atuputup o pineela awen ekewe aramas mi tunesikesikemong.
4Ir chokewe mi apasa, “Sa win ren ach kapas, nge kapasen awach a alisikich. Iö epwe tongeni nemenikich?”
5Nge ewe Samol mi Lapalap a üra, “Iei ngang üpwe feito, pokiten ekewe chon wöüngau ra osupwang, pwal ekewe chon mwelele ra ngüngü. Ngang üpwe alenier lon ewe lenien kinamwe ra älälei.”
6Än ewe Samol mi Lapalap kewe pwon ra allükülük o fatafatöch, usun silifer a kurufat me lon ewe lenien um lepwül, lupwen a ketel fän fisu pwe epwe limöch.
7Äm Samol mi Lapalap, kopwe amwöchükem, kopwe tümwünükem fansoun meinisin seni ei täppin aramas mi ngau.
8Pun ekewe aramasangau ra nom ekis meinisin, nge aramas meinisin ra pwapwaiti mine a ngau.
