1Echö än Asaf köl. Kot ewe Samol mi Lapalap, Ewe mi Unusen Manaman, a kapas o körifengeni chon fanüfan seni meserän tori apiläng.
2Kot a saramawu seni Sion, ewe telinimw mi unusen ling.
3Ach Kot a feito, nge esap fanafanala. Ekkei mi kümau a nom mwan, nge eu mölümöl mi watte a pwelifeili ünükün.
4A kökkötä ngeni ekewe läng, a pwal kökkö ngeni fanüfan pwe repwe küna, lupwen epwe apwüngü nöün kewe aramas.
5A apasa, “Oupwe amwichato rei nei kewe mi allükülük, chokewe mi eäni eu pwon ngeniei ren ar eäni eu asor.”
6Ekewe läng ra pwärätä pwe Kot a pwüng, pwe püsin i ewe soukapwüng.
7“Ämi nei aramas, oupwe rongorong, ngang üpwe kapas. Ämi chon Israel, üpwe ü ngenikemi ren ai pwärätä usumi. Ngang Kot, ämi we Kot.
8Üsap fönökemi pokiten ämi asor me ämi asoren kek oua uwato rei fansoun meinisin.
9Nge üsap osun eman ätemwänin kow seni ämi imwen man, ika eman kuuch seni ämi lenien man.
10Pun iteiten man mi nom lein wöllap nei, pwal ekewe kow mi nom won ekewe engeröü chuk nei.
11Üa silei ekewe machang won ekewe chuk meinisin, nge meinisin mine a mwökütüküt me lon ewe lemäl nei.
12Ika üpwe echik, üsap ürenikemi, pun fanüfan me masouan meinisin ai.
13Ifa usun, üa ochei fituken ekewe ätemwänin kow, ika ünümi chan ekewe kuuch?
14Ämi kilisou epwe ina ämi asor ngeni Kot. Oupwe apwönüetä ämi kewe pwon oua eäni ngeni Ewe mi Unusen Manaman.
15Oupwe köriei lon ränin ämi riaföü, pun ngang üpwe angasakemi, nge ämi oupwe mwareitiei.”
16Nge Kot a apasa ngeni ewe aramasangau, “Pwota ka tongeni leaweni ai kewe allük ika kapasen ai we pwon?
17Pun ka oput ai amirituk o pöütala ai kewe kapas.
18Are ka küna eman chon solä, ka chiechi ngeni, ka pwal nom ren ekewe chon lisowu.
19Ka chök akapasa kapasingau, nge kosap aposa awom seni kapasen atuputup.
20Ka chök tipitipimwäl ngeni pwiüm o aitengaua püsin nöün inom.
21Ekei mettoch en ka föri, nge ngang üa fanafanala. Ka ekieki pwe ngang usun chök en. Nge iei üpwe apwünguk o atipisuk.
22Oupwe ekieki usun ei, ämi mi manlükieila. Nge are ousap, üpwe arosakemiila, nge esap wor eman epwe amanauakemi.
23Eman mi kilisou ngeniei ina an asor ngeniei. Ren ei a asamoluei, nge eman mi aleasochisiei üpwe fokun amanaua.”
