1Ngeni ewe mi emweni chon köl: Echö än Tafit köl. Üa likitü le witiwiti än ewe Samol mi Lapalap epwe alisiei. I a aüselingaei o rongorong ai siö.
2A efieitä seni lon ewe pwang mi afeiengau, seni lon ewe pwakak, a anomuei won eu achau o anüküchara pechei pwe üsap mit.
3A aiti ngeniei echö köl mi fö, echö kölün mwareiti ach Kot. Chomong repwe küna ei o niuokus, repwe anomu ar apilükülük won ewe Samol mi Lapalap.
4A feiöch eman aramas a anomu an apilükülük won ewe Samol mi Lapalap, ätewe esap kul ngeni chon lamalamtekia, ika eti chokewe mi fel ngeni ekewe uluulun anümwäl.
5Ai Samol mi Lapalap ai Kot, ka föri chomong föför mi amwarar me om akot ngenikem, esap wor eman a wewe ngonuk. Are üpwe asilefeiliir o apworausa usur, repwe chomong seni ai üpwe tongeni aleaniir.
6Kosap mochen ekewe asor me lifang, nge ka ngeniei selingei pwe üpwe rongorong ngonuk. Kosap allük pwe üpwe eäni asoren kek me asoren tipis.
7Mürin üa apasa, “Ngang iei, üa feito. Lon ewe puken allük a mak usi.
8Üa pwapwa le föri letipom, ai Kot, om allük a nom lon lelukei.”
9Üa apworausa ewe pworaus mi mürina usun om amanauakem me lon ewe mwichen noum aramas meinisin. Üsap fokun ükütiu le apworausa usun, ka fen silei, ai Samol mi Lapalap.
10Üsap aopala ewe pworausen om amanauakem. Üa kapas usun om allükülük me om alisikem. Üsap tukumala seni ewe mwichen noum aramas meinisin om tong ellet me om allükülük.
11Ai Samol mi Lapalap, kosap amwöchü seniei om ümöümöch. Om tong ellet me om allükülük repwe tümwünüei.
12Chomong osukosuk ra pwelifeiliei, esap wor eman a tongeni aleaniir. Ai kewe tipis ra rongeeila pwe üsap chüen künaei, ra kon chomong lap seni meten mökürei, nge lelukei a kisikisila.
13Ai Samol mi Lapalap, kose mochen kopwe amanauaei. Ai Samol mi Lapalap, kopwe kaito pwe kopwe alisiei.
14Amwo meinisin mi mochen nieila repwe säw o tolong lon fitikoko. Amwo chokewe mi tipeni ai üpwe feiengau repwe kulsefäl o itengau.
15Amwo chokewe mi ämängauaei repwe fokun rükö ren ar kuf.
16Nge meinisin mi feito reöm repwe meseik o pwapwa. Chokewe mi aücheani om amanaueer repwe apasafochei, “Ewe Samol mi Lapalap a tekia.”
17Nge ngang üa wöüngau o osupwang, nge en ai Samol, ka ekiekiei. En ai chon alilis me ai Chon Amanau. Ai Kot, kosap mang le alisiei.
