1Ngeni ewe mi emweni chon köl: Echö köl än Tafit nöün ewe Samol mi Lapalap we chon angang. A apasa kapasen ei köl ngeni ewe Samol mi Lapalap lon ewe rän, lupwen ewe Samol mi Lapalap a angasa i seni lepöün ekewe chon oputa meinisin, pwal seni lepöün Saul. Iwe, a apasa: Ai Samol mi Lapalap, üa echenuk, en ai pöchökül.
2Ewe Samol mi Lapalap ai achau, i imwei imwen maun, pwal i chon angasaei, ai Kot, ai achau ewe ia üa op ie. A epeti seniei feiengau usun eu tittin maun, a peniei o tümwünüei.
3Üa kökköri ewe Samol mi Lapalap, ewe mi fich ngeni ach sipwe mwareiti. A amanauaei seni ekewe chon oputaei.
4Ekewe feiengauen mäla ra pwelifeiliei, ekewe öütöüten feiengau ra puitiei.
5Ekewe feiengauen lenien sotup ra pwelifeiliei, ekewe likatupun mäla ra mochen säreei.
6Üa kökköri ewe Samol mi Lapalap lon ai riaföü, üa siö ngeni ai Kot pwe epwe alisiei. A rongorong mweliei seni lon imwan imwenfel, a aüselinga ai siö ngeni.
7Iwe, fanüfan a chechech o mwöükük, nge longolongun ekewe chuk ra pwal chechech o chüngüchüng pokiten än Kot song.
8Ötüöt a ötüwu seni lon pwötün, nge ekkei lapalap a ngetewu seni lon awan, pwal mooch mi sarara a küwu seni.
9A tinenifeseni läng o feitiu. Kuchuchol ra nom fän pechen.
10A wawa eman kerop o äs, a müttir feito won pöükässin asepwäl.
11A pwölüela ngeni inisin rochopwak, kuchu mi malul o uren koluk ra pwelifeili.
12Seni lon ewe saramaram mi nom mwan ütten fau me moochen ekkei ra towu o tinenifeseni ewe kuchuchol.
13Ewe Samol mi Lapalap a pwal apüngü chopulap lon läng, Ewe mi Unusen Tekia a aronga mwelian.
14A esefichala wokun kewe föün esefich o atoropasa chon oputan, a efifi ngeniir inefi o asürela.
15Mürin, epin matau a pwä, longolongun fanüfan a lingetä, lupwen ka apwüngü chon oputom o leüömong ngeniir fän om song, ai Samol mi Lapalap.
16Iwe, ewe Samol mi Lapalap a angetiu seni won ewe leni mi tekia o amwöchüei, a efieitä seni lon ekewe koluk mi alolol.
17A angasaei seni ekewe chon pälüeniei mi pöchökül, seni chokewe mi oputaei, pun ra kon pöchökül ngeniei.
18Iwe, ra münitiei lon ränin ai feiengau, nge ewe Samol mi Lapalap a tümwünüei.
19A alisiei lon ai feiengau o angasaei, pun a pwapwa rei.
20Ewe Samol mi Lapalap a liwiniöchüei, pun üa föri mine a pwüng, a afeiöchüei, pun esap wor ai tipis.
21Üa aleasochisi än ewe Samol mi Lapalap kewe allük, nge üsap rik seni ai Kot ren och föför mi ngau.
22Üa apwönüetä an kewe allük meinisin, nge üsap aleasolap ngeni an kewe pwüüng.
23A silei pwe esap wor ai mwäl, pwe üa püsin tümwünüei seni tipis.
24Iei mine ewe Samol mi Lapalap a liwiniöchüei, pun üa föri mine a pwüng, pun a silei pwe esap wor ai tipis.
25Ai Samol mi Lapalap, ka allükülük ngeniir mi allükülük, ka pwal pwärätä om unusen pwüng ngeniir mi unusen pwüng.
26Ka pwärätä om limelimöch ngeni ir mi limelimöch, nge ekewe mi pwor manauer ka pwärätä om pöchökül ngeniir.
27Ka angasa aramas mi tipetekison, nge chokewe mi lamalamtekia ka atekisoneretiu.
28Ai Samol mi Lapalap, ka asarama manauei, en ai Kot ka awili ai rochopwak ngeni saram.
29Ewer, ren om alisiei üa tongeni fiu ngeni ekewe chon oputaei, ren en ai Kot üa tongeni mwet won eu tit.
30Än Kot kewe föför ra unusen pwüng, än ewe Samol mi Lapalap kapasen pwon a let. I a usun chök tittin maun fän iten chokewe meinisin mi op ren.
31Ewe Samol mi Lapalap i chök Kot. Kot echök ach achau.
32I ewe Kot mi apöchökülaei o anükünüköchü ai al.
33A amüttiriei usun müttirin chia, a pwal aleniöchüei won ekewe leni mi tekia.
34A asipa pei ngeni maun pwe üa tongeni pworefengeni efoch esefich seni piras.
35Ka epeti seniei feiengau o amanauaei, poum a amwöchüei, nge om alilis a atekiaeitä.
36Ka achölapa ewe al üa fetal won, pwe pechei esap mit.
37Üa tapweri chon oputaei o liapeniir. Üsap kulsefäl seniir tori ra rosola.
38Üa atururela pwe resap chüen tongeni ütä. Ra turula arun pechei.
39Ka ngeniei pöchökül pwe üa tongeni maun, ka pwal akufu me mwei ekewe chon ü ngeniei.
40Ka föri pwe ekewe chon pälüeniei ra sü seniei, üa arosala chokewe mi oputaei.
41Ra siö pwe eman epwe alisiir, nge esap wor eman a amanaueer. Ra siö ngeni ewe Samol mi Lapalap, nge esap pälüeniir.
42Üa üsiir pwe ra usun chök pipisüsü asepwäl a ässala. Üa puriretiu usun pwakaken lon ekewe al.
43En ka angasaei seni ekewe aramas mi ü ngeniei, ka seikieitä pwe üpwe samolun ekewe mwü. Ekewe aramas üsap sileer me mwan ra nom fän nemeniei.
44Ra aleasochisiei lon ewe otun ra rong mweliei. Chon ekis ra feito o chapetiu mwei.
45Iwe, ra apilükingau, ra towu seni ar kewe lenien maun mi pöchökül fän chechech.
46Ewe Samol mi Lapalap a manau. Üa mwareiti ai achau, üa ingeiti ai Kot mi amanauaei.
47Kot a atufichiei pwe üpwe ngeni chon oputaei chappen ar föför, a anomu fai aramasen ekewe mwü. A amanauaei seni ekewe chon pälüeniei.
48En ai Samol mi Lapalap ka atekiaeitä asen chon ü ngeniei o angasaei seni ekewe aramas mi mwäneson.
49Iei mine üpwe ingemwareituk me lein chon ekewe mwü. Ai Samol mi Lapalap, üpwe kölün mwareituk.
50Kot a ngeni nöün we king win mi lapalap o pwäri an tong ellet ngeni nöün we mi kepit, ngeni Tafit me mwirimwirin kewe tori feilfeilachök.
