1Echö än Tafit köl, lupwen a pomweni pomwen eman chon umwes me fän mesen Apimelek, pwe ätewe a asüela, nge Tafit a feila seni. Üpwe ingemwareiti ewe Samol mi Lapalap fansoun meinisin, üpwe chök mwamwareiti i.
2Ngang üpwe aingaing won ewe Samol mi Lapalap. Chokewe mi nom lon riaföü repwe rongorong o pwapwa ren.
3Oupwe etiei le asilefeili än ewe Samol mi Lapalap manaman, ousipwe mwareitifengeni itan.
4Üa iotek ngeni ewe Samol mi Lapalap, nge i a pälüeniei o angasaei seni ai kewe niuokus meinisin.
5Oupwe sachetä ngeni i pwe oupwe pwapwa, nge ousap säw.
6Ewe chon mwelele a siö, nge ewe Samol mi Lapalap a aüselinga o amanaua i seni an weires meinisin.
7Nöün ewe Samol mi Lapalap chon läng a nom pwelin ünükün chokewe mi niueiti i o angaseer seni feiengau.
8Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.
9Ämi nöün ewe Samol mi Lapalap kewe chon pin, oupwe meniniti i, pun chokewe mi meniniti i resap osupwang.
10Ekewe laion ra echik, pun esap wor ener. Nge chokewe mi aleasochis ngeni ewe Samol mi Lapalap resap osun och mettoch mi mürina.
11Oupwe feito, ämi nei mwän o aüselingaei, üpwe aiti ngenikemi usun ämi oupwe meniniti ewe Samol mi Lapalap.
12Iö me leimi a pwapwaiti manau o mochen manauatam pwe epwe alomota ekewe feiöch meinisin?
13Oupwe tümwünükemi pwe ousap eäni kapas mi ngau, ousap pwal kapas chofana.
14Oupwe kul seni mine a ngau o föri mine a mürina, oupwe kütta kinamwe ren unusen lelukemi.
15Ewe Samol mi Lapalap a mamasa ekewe chon pwüng, selingan a rongorong ngeni ar siö.
16Nge a ü ngeni chokewe mi föri mine a ngau, a föri pwe mürin ar mäla aramas repwe müttir manlükirela.
17Lupwen ekewe chon pwüng ra siön alilis, ewe Samol mi Lapalap a rongorong o angaserela seni ar weires meinisin.
18Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.
19Chomong riaföü ra tori ewe chon pwüng, nge ewe Samol mi Lapalap a angasala i seniir meinisin.
20A fokun tümwünü ewe chon pwüng, pwe esap mwo nge kup efoch chün.
21Föför mi ngau epwe afeiengaua ekewe aramasangau, nge chokewe mi oput ekewe chon pwüng repwe küna liwiningau.
22Ewe Samol mi Lapalap a amanaua nöün kewe chon angang. Esap wor eman lein chokewe mi eäni Kot lenien op epwe küna liwiningau.
